Беларусам патрэбны не «парадак», а прыватызацыя грамадскага транспарту
«Мінсктранс» трэба разрэзаць на часткі і распрадаць прыватным уласнікам.
У якасці разгорнутага каментара да дыскусіі пра інцыдэнт з кантралёрам у Наваполацку: паспрабуйце не заплаціць за праезд у прыватнай маршрутнай таксоўцы.
Ніхто вас не павязе і ніхто не будзе вас бараніць.
Як гэта робіцца ў нармальным, то бок прыватным сэктары эканомікі?
Табе аказваюць паслугу — ты за яе мусіш плаціць. Не плаціць за праезд у грамадскім транспарце — гэта тое ж самае, што красці рэчы з крамы, нават калі гэта невялікія і танныя рэчы.
Табе кліенты плоцяць грошы — ты павінен забяспечыць добрую якасць паслуг. Твой супрацоўнік не павінен перад вачыма кліентаў пасярод аўтобуса распальваць скандал з якой заўгодна прычыны. Маеш праблемы з збіраннем платы за праезд? Прыдумай механізм, каб усім было камфортна плаціць.
З саўковым грамадскім транспартам справа іншая, чым з маршруткамі.
Кантралёры сябе адчуваюць не сэрвісным персаналам, а чыноўнікамі і ўладай, таму і паводзяць сябе як турэмная вохра.Разбэшчаныя дзесяцігоддзямі сацыяльнага папулізму пасажыры лічаць, што ім нехта нечым абавязаны і што скрасці ў дзяржавы не сорамна, «усё калгаснае — усё маё». Вось і крадуць.
Рынак грамадскага транспарту будзе скажоны, пакуль на ім існуюць усе гэтыя саўковыя рэгіянальныя манапалісты з невымаўляльнымі назвамі. За выключэннем хіба што падземкі («метрапалітэну»), менскае, прыкладам, ДП «Мінсктранс» можна разрэзаць на часткі і распрадаць прыватным уласнікам. У гарадах і абласцях, дзе такой відавочнай «натуральнай манаполіі», як падземныя чыгуначныя лініі, няма —
сумневаў наконт прыватызацыі і шырокамаштабовага допуску прыватнікаў не можа быць ніякіх.Толькі канкурэнцыя прыватнікаў забяспечаць і адпаведную якасць паслугаў, і рэнтабельнасць транспартных прадпрыемстваў, і добрыя заробкі іхным супрацоўнікам.
Многія з нас забыліся, што грамадскі транспарт — гэта бізнэс.
Дзяржава не павінна займацца бізнэсам: яна павінна ствараць зразумелыя і спрыяльныя ўмовы для таго, каб бізнэсам займаліся грамадзяне.
Як мучылі Ціля Швайгера і цэнтры гарадоў, каб стварыць карцінку для судзімага за махлярства пратэжэ Дзмітрыя Баскава15
Каментары