Хабарадаўца Васільева: Я перадаў хабар намесніку мэра пад кантролем КДБ
Грошы хабару маглі пайсці на падтрымку Алімпійскай зборнай Беларусі.
Працягваецца суд над экс-намеснікам мэра Мінска Ігарам Васільевым. 28 снежня на працэсе з’явіўся Васіль Ананьеў, які і прынёс у кабінет высокага чыноўніка парфель з $250 тысячамі. Да гэтага было няясна, дзе ён знаходзіцца.
Ананьеў цяпер з’яўляецца абвінавачаным па іншай крымінальнай справе. Ён падазраецца ў падбухторванні да злачынства і ў дачы хабару.
Суддзя ўдакладніла, што ён схіляў мінчанку да перадачы $50 тысяч невысветленаму супрацоўніку КДБ нібыта за тое, каб не прыцягнулі да адказнасці яе сына. Сам Ананьеў патлумачыў па-іншаму: дапамагаў жанчыне вярнуць грошы, якія ў яе пазычылі.
У суд Васіль Ананьеў прыехаў у суправаджэнні двух чалавек у цывільным. Імаверна, але пра гэта так і не гаварылася, ён знаходзіцца пад хатнім аршытам. Згодна з паказаннямі Ананьева, Ігар Васільеў ад пачатку працы з чэшскімі інвестарамі патрабаваў хабар у $500 тысяч.
«Цягам паўтара года ён настойліва патрабаваў грошы, абяцаючы бізнэсоўцам праблемы».
А ўсё пачыналася ў канцы 2010-га. Сяргей Татун, прадстаўнік чэшскіх інвестараў, з’яўляецца даўнім знаёмцам Ананьева. Пры сустрэчы ў Мінску Татун расказаў пра намер пабудаваць у горадзе завод па перапрацоўцы смецця. Паскардзіўся і на праблемы. Ананьеў расказаў пра гэта свайму знаёмаму Смятаніну. А той паведаміў, што сябруе з «чалавекам з мэрыі», які можа ўсе пытанні вырашыць. А праз дзень агучыў суму за паслугі знаёмага — $500 тысяч.
Чэхі пагадзіліся, хаця і «былі проста ў шоку». А Татун, які, па словах Ананьева, з’яўляецца спонсарам Нацыянальнага алімпійскага камітэта Беларусі, заявіў, што лепш бы гэтыя грошы аддаў у дзіцячыя дамы ці Алімпійскай зборнай Беларусі.
На сустрэчы ў Мінскім гарвыканкаме Васільеў загаварыў пра хабар.
«Я хачу атрымаць свае грошы і атрымаць да падпісання дамовы, — так перадае словы чыноўніка Ананьеў. — Калі вы мне не заплаціце, ніякай інвестыцыйнай дамовы ў вас ні ў Мінску, нідзе ў Беларусі не будзе. Вы ведаеце, якую пасаду я займаю».
Ананьеў кажа, што Васільеў пастаянна казаў пра грошы. І не баяўся нават агучваць свае патрабаванні ў кабінеце.
Да сёння было няясна, як КДБ даведася пра хабар. Аказалася, што
Васіль Ананьеў напісаў заяву на імя кіраўніка КДБ Вадзіма Зайцава, у якой расказаў пра вымаганне хабару.
Адметна, што гэта адбылося праз тры дні пасля змяшчэння самаго Ананьева ў СІЗА. Па яго словах, напісаць такую заяву яго прымусіла пачуццё несправядлівасці. Маўляў, яго, сумленнага чалавека, арыштавалі ні за што, а высокі чыноўнік хоча атрымаць грошы і нічога за гэта яму не будзе. Ананьеў адмаўляе ціск з боку спецслужбы.
Усе наступныя сустрэчы яго з Васільевым адбываліся пад кантролем КДБ: з праслухоўваннем і схаванымі камерамі.
Калі 6 ліпеня Ананьеў прыйшоў да чыноўніка, той пачаў гаварыць, што баіцца, што за ім сочаць і праслухоўваюць. У кабінеце нават уключыў прыстасаванне, якое Ананьеў лічыць «глушылкай» ад «жучкоў». Але сам адчыніў шафу і сказаў, куда пакласці партфель з грашыма.
Цікава яшчэ, што чэшскія бізнэсоўцы не ведалі (і ці ведаюць сёння?), што Ананьеў звярнуўся ў КДБ. Невядома, чые гэта 250 тысяч даляраў, што прынеслі ў кабінет Васільева.
Глядзіце таксама:
Суд на Васільевым: супрацоўнікі КДБ і чорныя сумкі
Цяпер чытаюць
Беларус, які ваяваў за Украіну, распавёў, чым яго зачаравала каханка Іна Кардаш, агентка КДБ27
Каментары