Снапкоў: Беларусі пагражае рэзкі рост замежнага доўгу і дэвальвацыя
Мінэканомікі прагназуе рэзкі рост замежнай запазычанасці Беларусі ў 2013 годзе. Яна можа вырасці на 5 мільярдаў даляраў да $41,6 млрд.
Такія лічбы былі агучаныя ў дакладзе міністра эканомікі РБ Мікалая Снапкова на пасяджэнні Саўміна 13 лютага.
«Разлікі паказваюць, што ва ўмовах „класічнага“ выкарыстання дзяржаўнай падтрымкі дзеянні прадпрыемстваў накіроўваюцца не на развіццё, а на асваенне сродкаў. Ужо сёння на правядзенне мадэрнізацыі дадаткова заяўлена 3,5 млрд. даляраў ЗША інвестыцый…», — гаворыцца ў тэксце даклада.
«У выніку знешняя дзяржаўная пазыка можа вырасці да 17 млрд даляраў ЗША (з 12 млрд). Такім чынам, суадносіны замежнай дзяржаўнай запазычанасці да ВУП складуць 22,7% і наблізяцца да парогавага значэння бяспекі 25%», — адзначаецца ў дакуменце.
«Адпаведна, узрастае і паказчык валавой замежнай запазычанасці. У сувязі з гэтым, нават у выпадку спрыяльнай дынамікі эканамічнага развіцця ў краінах, якія нашы асноўныя гандлёвыя партнёры,
валавая замежная запазычанасць па выніках 2013 года можа скласці парадку 41,6 млрд даляраў ЗША (замест 34,8 млрд на 1 студзеня 2013 года) і перавысіць парогавае значэнне бяспекі (55,3% ВУП пры парогавым значэнні 55%)», — папярэджвае Мінэканомікі РБ.
Ведамства таксама прадказвае, што ў 2013 годзе мадэрнізацыя стане прычынай інвестыцыйнага імпарту на суму не меней за 1,6 млрд даляраў.
«Узніклы разрыў фінансавання плацежнага балансу можа быць кампенсаваны альбо за кошт зніжэння золатавалютных рэзерваў, альбо за кошт дэвальвацыі нацыянальнай валюты», — папярэджвае Мінэканомікі.
«Фінансаванне за кошт дэвальвацыі нацыянальнай валюты, як нам вядома, вядзе да паскарэння інфляцыі, спекулятыўнага попыту на валюту, росту адсоткавых ставак росту долі праблемных актываў», — канстатаваў міністр у сваім дакладзе.
Цяпер чытаюць
«Вы прыйшлі сюды лохамі, а станеце драпежнікамі». Як працуюць мінскія кол-цэнтры скамераў5
Каментары