Стала вядома, у што ператворыцца закінутая грамадская прыбіральня на беразе Свіслачы ў цэнтры Мінска
У адміністрацыі Ленінскага раёна днямі стартуе грамадскае абмеркаванне цікавага праекта. Гаворка ідзе пра рэканструкцыю грамадскай прыбіральні на набярэжнай Свіслачы, якая даўно пустуе. Калісьці будынак хацелі ператварыць у рыбны рэстаран, але жыхары выступілі рэзка супраць. Гэтым жа разам тут хочуць адкрыць пункт пракату спартыўнага рыштунку, піша Realt.by.
Нядзейная грамадская прыбіральня знаходзіцца на вуліцы Чырвонаармейскай, 34Б. Месца тут шыкоўнае. Побач — парк імя 40‑годдзя Вялікага Кастрычніка, гатэль «Пекін», галоўная гарадская веладарожка і набярэжная ракі Свіслач.
Пусты зялёны будынак плошчай 45 квадратаў неаднаразова выстаўлялі на таргі і спрабавалі інтэграваць у гарадское асяроддзе. Яшчэ ў 2010‑х тут збіраліся адкрыць рэстаран Porto del Mare. Раённая адміністрацыя была не супраць, аднак праект заблакавалі жыхары суседніх дамоў, якія баяліся маштабнага высякання дрэў. Пазней у будынку хацелі арганізаваць кавярню, але і з ёй не атрымалася.
Летась былая прыбіральня нарэшце знайшла новага інвестара. Будынак прадалі з аўкцыёну за 91 тысячу рублёў.
Новы ўласнік плануе рэканструяваць закінуты будынак пад пункт пракату інвентару: ровараў, лыжаролераў, ролікавых канькоў і іншага спартыўнага рыштунку. Пры гэтым функцыі грамадскай прыбіральні тут таксама захаваюцца. Стары будынак грунтоўна перабудуюць, захаваўшы частку цагляных сцен і бутавай муроўкі.
У выніку ўсіх пераўтварэнняў плошча комплексу вырасце з 45 да 102 квадратаў. Пункт пракату атрымае схілавы дах і эфектнае вітражнае шкленне.
Азнаёміцца з праектам можна на афіцыйным сайце адміністрацыі Ленінскага раёна. Грамадскае абмеркаванне будзе праходзіць з 29 ліпеня па 12 жніўня. Заўвагі і прапановы з пазнакай «грамадскае абмеркаванне» прымаюць толькі ў гэты тэрмін па адрасе: 220006, Мінск, вул. Маякоўскага, 83 (або па электроннай пошце: [email protected]). Вынікі грамадскага абмеркавання падвядуць на пасяджэнні архітэктурна-горадабудаўнічай Рады пры галоўным архітэктару горада Мінска.
Цяпер чытаюць
Здзелка Трампа з Пуціным: чым за яе могуць заплаціць Украіна і Беларусь11
Здзелка Трампа з Пуціным: чым за яе могуць заплаціць Украіна і Беларусь
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі77
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі7
«Запрасіў мяне на спатканне і прыехаў на яго з пакетам памідораў замест кветак». Што ўспамінаюць пра Яна Памедора Рэуцкага, адміна шматтысячнай суполкі беларусаў Польшчы77
Каментары