Закладнікі мадэрнізацыі: праз рамонт чыгункі жыхары Мар’інай Горкі вымушаны мяняць працоўныя графікі
«Беларуская чыгунка выбіла мяне з каляіны на паўгода».
У Рэдакцыю звярнуўся жыхар горада Мар’іна Горка Павел. Ён штодня ездзіць на працу ў Мінск. Свой працоўны графік ён скарэктаваў так, што дабіраўся хуткаснымі электрычкамі: туды і назад дарога займала па гадзіне. Але ад 11 сакавіка адбыліся каардынальныя змены ў раскладзе.
«Цяпер я не магу нармальна трапіць на працу. Раней я выязджаў а 7.59 і а 8.59 ужо быў у сталіцы. А назад вяртаўся на 18.42. Цяперака мне трэба выязджаць а 6.55 і электрычка едзе 1 гадзіну 35 хвілін, а прыбывае яна на Інстытут культуры».
Павел скардзіцца, што наступная электрычка адпраўляецца толькі ў 8.39. Калі раней яна выязджала на дзесяць хвілін раней і была таксама хуткаснай, то цяпер прыбывае ў Мінск а 10.05.
«Я патэлефанаваў на гарачую лінію чыгункі.
Патлумачылі, што такія нязручнасці ўзніклі праз рэканструкцыю інфрастурктуры — пераходы там, пераезды... І будзе цягнуцца ўсё паўгода — толькі пасля 7 лістапада зменіцца.
Сказалі, што пусцяць «гарадскія лініі». Лукашэнка звычайна да гадавіны Кастрычніцкай рэвалюцыі любіць адкрыць новыя станцыі метро. Можа пад яго цяпер і робяць інфрастуктуру, каб ён святочна стужачку перарэзаў?»
Паўла больш абурае нават не ўзніклая нязручнасць, бо заўсёды можна свой графік змяніць (без станцыі метро «Кастрычніцкая» пазалетась цэлы Мінск жа абыходзіўся працяглы час), а падыход.
«Я пяць разоў на тыдзень езджу ў электрычцы. І ні разу не чуў, каб машыніст папярэдзіў, што змяняецца расклад. Я не хаджу ў білетныя касы, бо маю праязны. І адкуль тады мне даведацца, што электрычкі адмененыя?
Добра, што я выпадкова спраўдзіў расклад на сайце чыгункі. А на вакзале ў Мінску бачыў людзей, хто махаў рукой ад’язджаючай электрычцы, бо яе графік ссунулі на дзевяць хвілін наперад. Пра ўсіх жа людзей трэба думаць».
Мужчына патлумачыў, што з Мар’інай Горкі на працу і вучобу ў Мінск ездзіць шмат людзей. І пасля апошняй дэвальвацыі нямала хто з іх адрокся паездак маршруткай — стала дорага.
«Праезд у электрычцы ў адзін бок абыходзіцца 4750 рублёў, маршруткай — 15 тысяч. Розніца адчувальная.
Але давядзецца зноў вяртацца да іх, бо на працу трэба ж прыязджаць своечасова. А адмянілі не адну ранішнюю электрычку — тры: на 7.22, 7.59, 8.28. Можа зноў расквітнее бізнэс маршрутчыкаў».
Беларускім топ-чыноўнікам у Валгаградзе раздалі каларадскія стужкі. Марзалюк застаўся з яблыневай ФОТЫ8
Каментары