Родныя збітага школьніка Улада Грудзьева патрабуюць вялікай кампенсацыі: але што можа вызначыць яе памер?
Мама, бабуля і дзядуля загінулага трэцякласніка Улада Грудзьева звярнуліся ў суд з грамадзянскімі пазовамі аб кампенсацыі маральнай шкоды. Яны патрабуюць спагнаць з ужо асуджанага кіроўцы «Поршэ Каена», што збіў іх хлопчыка, 450 мільёнаў рублёў.
Андрэя Забабуру асудзілі на чатыры гады калоніі-пасялення. Яшчэ да суда ён перадаў маці трэцякласніка 200 млн рублёў. Паабяцаў дапамагаць і надалей.
На працэсе пацярпелыя не выстаўлялі прэтэнзій па кампенсацыі. Яны не выказваліся і пра меру пакарання. Змену сваёй пазіцыі патлумачылі адказам на рэакцыю самога Забабуры: бізнэсовец прызнаў сябе вінаватым толькі маральна, але абвінавачванне адхіліў. І абскардзіў прысуд.
Ці этычна цяпер патрабаваць грошы за смерць хлопчыка? Такім пытаннем задаліся чытачы «Нашай Нівы». Ды і забіраць грошы давядзецца ў траіх дзяцей асуджанага.
«Цікава, што б яны патрабавалі ад мужыка на якім-небудзь «Жыгулі», — цікавіцца чытач пад нікам Hitme. Маўляў, ці толькі паводзінамі Забабуры выклікана такая высокая сума. Альбо найперш ягонае прадстаўнічае аўто «Поршэ» паўплывала на такі пазоў?
«Я не разумею, кампенсацыя чаго? — пытаецца Сарачка Фельдман. — Гэта ж не карову гадавалі і трацілі на яе грошы, каб яна мяса і малако давала. Для чаго дзеці патрэбныя? Каб было каму забяспечваць? Альбо для таго, каб была родная крывінка, родны чалавек побач, калі нікога больш не застанецца. Брыдка. Калі і падаваць у суд, то на павелічэнне тэрміну адседкі».
Іншыя раяць прымераць на сябе гора мамы, якая страціла адзінае дзіця. Тады і стаўленне да сітуацыі памяняецца. І тлумачаць, што грошы гэтыя — зусім не кампенсацыя за сына. «Падлічыце, чаго каштуе вынасіць дзіця, нарадзіць і выгадаваць да паўналецця. Вось і выйдзе гэтая сума. Людзі хочуць другое дзіця — у кіроўцы ж іх трое. І няхай гадуюць яго на сродкі гэтага Забабуры. Правільныя пазовы. Маральная шкода, лячэнне ад стрэсу — нічога не каштуе па-вашаму? Ды ён скараціў на 20 гадоў жыццё гэтым дзядулі і бабулі», — напісаў чытач Ох.
Юрась Белавус лічыць, што ў той трагедыі ёсць віна кожнага. Але «за свае і за чужыя грахі» давядзецца адказваць аднаму чалавеку. «Не прыдумала яшчэ чалавецтва, акрамя грашовай кампенсацыі, ніякай іншай. І правільна зрабіў Андрэй Забабура, што перадаў 200 мільёнаў рублёў яшчэ да суда. І пададзеныя пазовы — правільныя. Але чаму суд не палічыў гэты і іншыя факты змякчаючымі віну і ўклеіў яму амаль напоўніцу? Толькі на той падставе, што ён не прызнаў сваю віну? На мой погляд, вінаватыя і родныя хлопчыка, бо не даглядзелі за дзіцём. Вінаватая і школа, якая проста кінула ноччу малых дзяцей гуляць. Вінаватыя і бацькі, якія заязджаюць у двор школы. Андрэй Забабура ў гэтым спісе — адзін з вінаватых».
Каментары