Праект Закону «Аб інфармацыі, інфарматызацыі і абароне інфармацыі» ўключаны ў парадак дня восеньскай сэсіі ніжняй палаты парлямэнту.
Праект Закона «Аб інфармацыі, інфарматызацыі і абароне інфармацыі» ўключаны ў парадак дня восеньскай сесіі ніжняй палаты «парламента». Кіраўнік працоўнай групы па распрацоўцы законапраекта «дэпутат» Таццяна Сафроненка паведаміла, што падчас распрацовак законапраекта ўзніклі шмат спрэчных пытанняў, якія маецца абмеркаваць на восеньскай сесіі.
«Вельмі цяжка прапісаць абмяжоўваючы крытэр, які забяспечыў бы, з аднаго боку, права на прыватнасць, а з другога — права людзей на інфармацыю», — сказала Таццяна Сафроненка.
На думку «дэпутата», «часта ў Інтэрнэт і СМІ трапляе неправераная інфармацыя». «А каму прад`явіць прэтэнзіі, калі гэтая інфармацыя незразумела ад каго выйшла?», — прыводзіць «Тэлеграф» словы кіраўніка працоўнай групы па падрыхтоўцы законапраекта.
У сваю чаргу, намеснік дырэктара дэпартамента інфарматызацыі Міністэрства сувязі і інфарматызацыі Беларусі Алег Сякліцкі падкрэсліў, што «ў законапраекце няма прамых палажэнняў наконт абмежавання інфармацыйных рэсурсаў інтэрнэт‑прасторы».
Працоўная група, якая займаецца падрыхтоўкай законапраекта, атрымала больш як 200 заўваг ад арганізацый, якім дакумент адпраўляўся на ўзгадненне. Шматлікія рэкамендацыі распрацоўшчыкі згадзіліся ўлічыць.
«Напрыклад, мы адмовіліся ад абавязковай дзяржаўнай рэгістрацыі агульнадаступных інфармацыйных сістэм. Гэта неабгрунтаваная перашкода. Калі інфармацыя агульнадаступная, то навошта яе рэгістраваць? Цяпер сябрамі працоўнай групы вядзецца актыўная дыскусія наконт мэтазгоднасці абавязковай ідэнтыфікацыі карыстальнікаў інфармацыйных сістэм», — паведаміла Таццяна Сафроненка.
Законапраект, які распрацоўвае працоўная група, быў ініцыяваны Міністэрствам сувязі і інфарматызацыі, а таксама Дзяржаўным цэнтрам бяспекі інфармацыі пры Прэзідэнце Рэспублікі Беларусь.
Выступаючы нядаўна ў рэдакцыі «Советской Белоруссии» з нагоды юбілею газеты, Аляксандр Лукашэнка даручыў спыніць «анархію ў Інтэрнэце». «Трэба прымаць закон і прапісаць у ім статус электронных СМІ. Анархію ў Інтэрнэце трэба спыняць», — заявіў Аляксандр Лукашэнка.
Цяпер чытаюць
У турме памёр былы супрацоўнік КДБ Мікалай Варапай, асуджаны за шпіянаж на карысць Украіны3
Каментары