Пераможца розыгрышу гандбольнага Кубка выкліку сезона-2012/2013 вызначыцца 26 мая ў «Мінск-Арэне» пасля другога фінальнага матчу паміж мінскім СКА і «Эшам» з Люксембурга.
Першапачаткова ў выніку лёсавання мінскі СКА другі фінальны матч павінен быў праводзіць у Люксембургу, а першы — у Мінску. Аднак 18 мая і сталічны Палац спорту, і «Мінск-Арэна» занятыя пад іншыя мерапрыемствы, і армейцы звярнуліся да супернікаў з просьбай памяняць чарговасць вырашальных гульняў. Кіраўніцтва люксембургскага «Эша» пайшло насустрач беларусам і сёння адказала згодай правесці першую гульню ў сябе дома 18 мая, а 26 мая згуляць на паркеце 15-тысячнай «Мінск-Арэны».
Апошні раз падапечныя Спартака Міронавіча гулялі ў фінале кантынентальных турніраў у далёкім 1992 годзе, калі ў вырашальных сустрэчах Кубка ЕГФ саступілі па суме дзвюх сустрэч нямецкаму «Валау». Раней мінскі СКА тройчы валодаў Кубкам еўрапейскіх чэмпіёнаў (1987, 1989, 1990), два разы выйграваў Кубак уладальнікаў кубкаў (1983, 1988) і аднойчы заваяваў еўрапейскі Суперкубак (1989).
