Чэмпіён Польшчы па боксе, што раптоўна вярнуўся ў Беларусь, патлумачыў нечаканае вяртанне
Уладальнік тытула міжнароднага чэмпіёна Польшчы па боксе Яўген Макарчук, 32‑гадовы ўраджэнец Ліды, які яшчэ нядаўна заяўляў пра жаданне выступаць пад польскім сцягам, нечакана вярнуўся ў Беларусь.
У інтэрв'ю Sport.tvp.pl ён патлумачыў вяртанне тым, што польскія менеджары яго падманвалі:
«Я з’ехаў з Польшчы, бо Віктар Матэран і Дзяніс Звонік мяне падманулі, і я зразумеў, што лепш не мець справы з такімі людзьмі».
Яўген кажа, што ў яго ёсць доказ, што яны падпісалі кантракт на бой у Швейцарыі ў снежні 2024 года без яго ведама.
«Яны сцвярджалі, што ім тэрмінова патрэбны мой подпіс. Яны таксама падманулі мяне на 1500 еўра. Казалі, што ганарар за бой складае 9000 еўра, але я звязаўся з арганізатарамі вечара боксу, і яны даслалі мне сапраўдны кантракт, у якім была сума 10 500 еўра. Яны проста скралі ў мяне 1500 еўра.
Пазней я размаўляў з прамоўтарам Марыюшам Грабоўскім, прасіў яго разабрацца ў гэтай справе, але ён нічога не зрабіў. У мяне склалася ўражанне, што ён быў на іх баку», — кажа Яўген.
«Праблема з’явілася ў снежні 2024 года ў сувязі з боем у Швейцарыі, калі Звонік падпісаў кантракт за мяне. Матэран з невядомых прычын даслаў яму дамову, а той яе падпісаў. Не я! Я не хацеў там баксаваць, бо за месяц да гэтага была гала Tymex, і я хацеў выступіць там. Але тады мне сказалі, што я не магу там выступаць і павінен ехаць у Швейцарыю», — кажа Яўген.
Ён збіраецца падаць пазоў, бо ў яго, заяўляе баксёр, ёсць усе доказы таго, што «гэта махляры і што яны падрабляюць подпісы. «У мяне таксама ёсць паведамленні, у якіх яны паклёпнічаюць на мяне без якіх-небудзь доказаў», — кажа ён.
У яго спыталі, ці былі ў яго якія-небудзь праблемы ў Беларусі па вяртанні.
— Былі пытанні, чаму я баксаваў за Польшчу. Я баксаваў, таму што ў мяне была польская ліцэнзія, — адказаў ён.
На пытанне, ці дапытвалі яго службы пасля вяртання, сказаў, што «размова была», але ён «нічога не зрабіў супрацьзаконнага».
— Чаго мне баяцца? Я спартовец, не палітык, — кажа ён.
Ён дадае, што ніколі не адмовіцца ад свайго беларускага:
— Я тут нарадзіўся, і гэта мой дом!
Яўген Макарчук пераехаў у Польшчу восенню 2022 года і неўзабаве стаў выступаць на рынгу ў гэтай краіне. Ён вучыў польскую мову, меў намер атрымаць грамадзянства.
«У маёй сям’і нас з пакалення ў пакаленне выхоўвалі ў духу польскасці. Дагэтуль мы з блізкімі падтрымліваем польскія традыцыі і звычаі. […] Мне падабаецца ў Польшчы, я адчуваю сябе тут як дома. Я паляк. Мая мара — заваяваць пояс чэмпіёна свету для Польшчы», — казаў баксёр у інтэрв’ю яшчэ восенню 2024 года.
Цяпер ён кажа наступнае: «Я сказаў тады, што хачу заваяваць пояс для Польшчы, бо ў той час выступаў прафесійна па польскай ліцэнзіі. Магу сказаць адно: мне там было вельмі цяжка жыць. Ментальнасць, людзі… усё зусім іншае. Да таго ж я нават дрэнна гавару па-польску, таму мне было цяжка. Я проста гнаўся за марай стаць чэмпіёнам свету».
Віктар Матэран, каментуючы Sport.tvp.pl сітуацыю з Макарчуком, заявіў, што абвінавачанні на яго адрас з’яўляюцца няпраўдай і маюць на мэце апраўдаць рашэнне выехаць з Польшчы ў Беларусь, прынятае значна раней і ў згодзе з трэцімі асобамі.
«Усе кантрактныя і фінансавыя пытанні выконваліся ў адпаведнасці з дамоўленасцямі і дзеючымі стандартамі. Я ніколі не падпісваў і не даручаў падпісваць якія-небудзь дакументы без ведама спартсмена.
Паводзіны Яўгенія задоўга да ад’езду сведчылі пра падрыхтоўку да разрыву дамоўленасцяў і змены напрамку кар’еры, што было вядома людзям са спартыўнага асяроддзя. Цяперашнія абвінавачанні я разглядаю як спробу перакласці адказнасць за ўласныя рашэнні, кантэкст і наступствы якіх выклікаюць абгрунтаваныя пытанні», — заявіў Матэран.
Музыка Цім Суладзэ: Розніца 30 гадоў — тое, што адпавядае маім уяўленням пра адносіны41
Каментары