Пасьля масавых арыштаў і судоў апошняга тыдня маці палітзьняволеных вырашылі аб’яднаць свае намаганьні. Да іх жадаюць далучыцца бацькі ды іншыя сваякі соцень беларускіх палітвязьняў, якія адбываюць цяпер адміністратыўнае й крымінальнае пакараньне, знаходзяцца пад сьледзтвам.
Пасьля масавых арыштаў і судоў апошняга тыдня маці палітзьняволеных вырашылі аб’яднаць свае намаганьні. Да іх жадаюць далучыцца бацькі ды іншыя сваякі соцень беларускіх палітвязьняў, якія адбываюць цяпер адміністратыўнае й крымінальнае пакараньне, знаходзяцца пад сьледзтвам.
Ініцыятыва стварэньня Камітэту маці палітвязьняў нарадзілася стыхійна ў чэргах ля сьцен турмаў, у судовых калідорах, калі сем’і арыштаваных прыхільнікаў перамен шукалі сваіх, абменьваліся паміж сабой інфармацыяй, разам віталі дзяцей ля турмы на Акрэсьціна, – паведаміла маці аднаго з палітвязьняў, Эла Гарэцкая.
(Гарэцкая: ) «Праца будзе ў тым, каб падтрымліваць усіх, хто патрапляе ў турмы, усялякім чынам. Гэта шмат працы й надоўга».
На гэты час ужо ўтварылася два выразныя колы такіх актывістак, зацікаўленых у стварэньні сваёй структуры. Сувязь паміж імі трымаецца пераважна на асабістых і тэлефонных кантактах, а празь дзень-два адбудзецца ўстаноўчы сход Камітэту маці палітвязьняў. Бліжэйшым часам яны зьбіраюцца сустракацца з прадстаўнікамі ААН, АБСЭ, Чырвонага крыжу.
Гаворыць адна з ініцыятарак заснаваньня Камітэту жонка лідэра апазыцыі Аляксандра Мілінкевіча Іна Кулей, сын якой, Ігар, адбывае адміністрацыйнае пакараньне, 15 сутак, за ўдзел у акцыях пратэсту супраць несумленных выбараў.
(Кулей: ) «Ідэя паўстала ад некалькіх бацькоў. Сярод іх ёсьць выдатныя арганізатары й агітатары. Адна зь іх – з хлебазаводу (пакуль ня буду называць прозьвішча). Дык гэтая жанчына папросту мітынгі там наладжвала й расказвала, як яе, абсалютна не заангажаваную ў палітыку, сын навучыў не баяцца. Гэта народная ініцыятыва такая – з усіх па ніціне, як кажуць».
Спадарыня Кулей мяркуе: пакуль што ўсе бацькі зацікаўлены адным – як даставіць сваім дзецям-палітвязьням харчовыя й рэчавыя перадачы. Аднак яна верыць, што згуртаваньне маці спатрэбіцца ня толькі цяпер, але й пазьней, калі рэпрэсіі супраць іхных дзяцей набудуць іншыя формы. Істотна, што Іна Кулей мае вялікі досьвед грамадзкай працы, і гатова дзяліцца сваімі высновамі.
(Кулей: ) «Цяпер я бачу, што бацькі давяраюць мне й яшчэ пары-тройцы такіх жанчын. Гэта папросту такое лобі. Я думаю, што гэты камітэт самаарганізуецца й будзе дзейнічаць. І тая справа й праца, якую я рабіла ўсё жыцьцё (грамадзкая дзейнасьць – у нас жа быў такі інкубатар, цэнтар падтрымкі грамадзянскіх ініцыятываў), будзе дапамогай – каб людзі хутчэй маглі арганізавацца».
Жонка арыштаванага лідэра апазыцыі Аляксандра Казуліна Ірына вітала гэтую ініцыятыву:
(Казуліна: ) «Я за стварэньне такога камітэту. Лічу, што гэта вельмі правільна. Але там мусяць быць не абавязкова жанчыны – і мужчыны таксама. І не абавязкова толькі маці, а могуць быць і сябры асуджаных».
Бацька зьняволенай студэнткі Эканамічнага ўнівэрсытэту Іван Вашкевіч таксама хоча далучыцца да гэтай структуры:
(Вашкевіч: ) «Яна будзе прыцягваць увагу да тых парушэньняў, што чыняцца. Па-другое, яна будзе папярэджваць такія факты – каб іх больш не было».
Каментары