Мацкевіч: Ціханоўскую зняць, замяніць, пераабраць нельга. Не мучайцеся. Нельга — і ўсё
Філосаф і былы палітвязень раіць усім скарыстацца сімвалічным капіталам Ціханоўскай для дасягнення агульнай мэты.
Філосаф Уладзімір Мацкевіч выклікаў агонь на сябе. Ён рэзка раскрытыкаваў тых, хто дыскрэдытуе Святлану Ціханоўскую, і прызнаў, што зачараваны ёй як унікальнай з’явай.
«Захавайце тое, што я зараз напішу. У мемарыз! Як казалі на досвітку інтэрнэту. Або зарубіце сабе на носе! Як казалі настаўнікі тармазнутым вучням у тыя часы, калі з імі не насіліся як з пісанай торбай.
Ціханоўскую зняць, замяніць, пераабраць НЕЛЬГА.
Нельга — і ўсё. Не таму, што я ў яе закаханы (а я і праўда ёй зачараваны), не таму, што ў ёй вельмі мае патрэбу Франак Вячорка ці нехта яшчэ.
А таму, што яна стала Святланай Ціханоўскай у выніку ўнікальнай і непаўторнай падзеі. Гэта немагчыма паўтарыць, а галоўнае — і не трэба. Таму ніхто не можа заняць яе месца.
Не мучайцеся, не рабіце таго, што НЕМАГЧЫМА.
Лепш думайце пра тое, як гэтай унікальнай з’явай скарыстацца. Выкарыстаць яе ў мірных мэтах, для дасягнення нашай агульнай мэты. Бо пакуль велізарны сімвалічны капітал (дарэчы, не яе асабісты капітал, а наш агульны) Святланы Ціханоўскай растрачваецца. І імкліва растае. Як бацькоўская спадчына, якую марнатравяць ханурыкі-мажоры.
І ўсе, хто з дурноты лае і дыскрэдытуе Ціханоўскую, — гэта і ёсць тыя самыя марнатраўцы.
Сказанае не датычыцца Офіса і Кабінета. Іх трэба крытыкаваць — і ёсць за што. Супрацоўнікі Офіса і Кабінета таксама марнуюць не свой капітал», — пераконвае Уладзімір Мацкевіч.
Філасаф і метадолаг Уладзімір Мацкевіч у жніўні 2021 года быў арыштаваны КДБ. У чэрвені 2022 года Мінскі абласны суд асудзіў яго на пяць гадоў калоніі за ўдзел у пратэстах, стварэнне «экстрэмісцкага фармавання» і «абразу Лукашэнкі». У верасні 2025 года быў вызвалены і дэпартаваны ў Літву.
Каментары
А лідарства заслугоўваецца! Гэта заслуга не толькі Святланы Ціханоўскай, але і яе каманды! Мы бачым ванікі вышай працы, бачым вашу прадстаўнічую дзейнасць і ўдзячны за яе!