«Нанёс супрацоўніку міліцыі не менш за восем удараў кулакамі па галаве»
У Баранавіцкім раёне малады мужчына збіў участковага, калі той заступіўся за ягоную жонку.
Інцыдэнт адбыўся ўвечары 3 жніўня, піша Intex-press. Участковага інспектара выклікалі на сямейны скандал у вёску Моўчадзь. Пад'язджаючы да згаданага дома, ён заўважыў маладога мужчыну, які бегаў па двары і мацюкаўся.
Міліцыянт спыніўся, выйшаў з машыны і пачаў размаўляць з дэбашырам, спрабуючы яго супакоіць. Здавалася, яму гэта ўдалося. Аднак тут ад суседкі выйшла жонка вяскоўца, і ён тут жа кінуўся да яе з кулакамі.
Участковы ўстаў на абарону жанчыны, і тады раз'юшаны муж стаў збіваць міліцыянта.
«Ён нанёс супрацоўніку міліцыі не менш за восем удараў кулакамі па галаве, а потым уцёк. Яго месцазнаходжанне пакуль не ўстаноўлена, але гэта ўсяго толькі справа часу», — паведамілі ў Баранавіцкім міжраённым аддзеле Следчага камітэта.
На жыхара Моўчадзі 5 жніўня завялі крымінальную справу за супраціў супрацоўніку міліцыі. Яму можа пагражаць да пяці гадоў пазбаўлення волі.
Цяпер чытаюць
Джон Коўл прыедзе ў Беларусь 15 верасня. Лукашэнка, аднак папярэдзіў: «вялікай здзелкі» не будзе6
Каментары