Але іншага суда не пазбегне.
28-гадовы мінчук 3 жніўня на сяброўскім Jeep Grand Cherokee у раёне сталічнай вуліцы Пажарскага збіў 6-гадовага хлопчыка, якія выбег на праезную частку. Хлопчык застаўся жывым, але быў шпіталізаваны.
«Згодна з заключэннем судова-аўтатэхнічнай экспертызы, кіроўца «не меў тэхнічнай магчымасці прадухіліць наезд на пешахода шляхам прымянення мер экстраннага тармажэння». Крымінальны пераслед кіроўцы па падазрэнні ў парушэнні ПДР, што пацягнула па неасцярожнасці нанясенне цяжкага цялеснага пашкоджання, спынены»,
— паведаміў прадстаўнік упраўлення Следчага камітэта па Мінску Аляксандр Герасімаў.
Медыцынскі агляд выявіў, што кіроўца ў момант наезду быў нападпітку. Пры сабе ў яго адсутнічалі правы і дакументы на аўто. Гэтыя парушэнні не паўплывалі на здзейснены наезд, але адказваць за іх давядзецца.
«Матэрыялы па названых правапарушэннях накіраваныя ў падраздзяленне Дзяржаўтаінспекцыі для прыцягнення кіроўцы да адміністрацыйнай адказнасці», — сказаў Герасімаў.
Але на кіроўцу завялі новую крымінальную справу — за ўгон Jeep Grand Cherokee. Заяву напісаў уладальнік аўто: ён паведаміў, што сябар сеў за руль яго машыны без дазволу. Цяпер справу рыхтуюць да перадачы ў суд.
Абвінавачаны знаходзіцца пад вартай.
Каментары