У Мінску хлопец пайшоў на канфлікт з-за расійскага сцяга ў кіроўцы аўтобуса
У Мінску быў затрыманы актывіст аргкамітэту па стварэнні партыі «Беларуская Хрысціянская Дэмакратыя» Алесь Кутасаў, які папрасіў прыбраць сцяг з лабавога шкла аўтобусу «Калодзішчы-Мінск», паведамляе сайт bchd.info.
Зайшоўшы ў аўтобус і пабачыўшы расейскі сцяг, Алесь Кутасаў на першым жа прыпынку папрасіў кіроўцу прыбраць сцяг, але той, агрызнуўшыся, зачыніў вакенца.
На наступным прыпынку ў аўтобус увайшла кандуктар, якая папрасіла паказаць дакументы на праезд. «Я ёй сказаў, што аплачу толькі тады, калі будзе прыбраны сцяг», — адзначыў актывіст.
На дыспетчарскай станцыі кандуктар перадала актывіста міліцыянтам, абвінаваціўшы яго ў тым, што ён дэбашырыў і ледзь не лез у кабіну кіроўцы.
Разам з тым прайсці ў міліцэйскі пастарунак для запісу паказанняў кандуктар адмовілася, а кіроўца між тым прыбраў сцяг з аўтобуса.
Па словах затрыманага, па дарозе ў пастарунак міліцыянты абураліся, што ён размаўляе па-беларуску, бо, паводле іх словаў, беларускай мовы не існуе, а існуе толькі трасянка, а Расія з'яўляецца найбліжэйшым хаўруснікам Беларусі.
У адказ актывіст заявіў, што лічыць расейскі сцяг сімвалам расейскай акупацыі. Паколькі ж аўтобус з'яўляецца дзяржаўнай уласнасцю і аплочваецца грамадзянамі, у тым ліку і ў выглядзе падаткаў, то і падобных прадметаў у грамадскім транспарце быць не павінна, сказаў ён.
У пастарунку Алеся Кутасава пратрымалі дзесяць хвілін і, «прабіўшы па базе», адпусцілі, запісаўшы, што правялі тлумачальную размову.
Між тым актывіст БХД ужо даслаў скаргу у Мінсктранс. «Чакаю адказу», — адзначыў ён.
Цяпер чытаюць
У Чэхіі малады беларус трапіў у кому — наглытаўся таблетак праз праблемы з легалізацыяй і разрыў з дзяўчынай21
Каментары