На гэтым тыдні па-ранейшаму не па сезоне будзе цёпла, паведаміў начальнік службы гідраметэаралагічных прагнозаў Рэспубліканскага гідраметэацэнтра Дзмітрый Рабаў 30 снежня падчас відэабрыфінгу.
«У канцы гэтага года і ў пачатку новага істотных зменаў у надвор'і не адбудзецца. Сярэдняя сутачная тэмпература чакаецца на 3—6°С вышэй за норму. Адзіны плюс, што актыўных цыклонаў і ўраганаў не чакаецца», — адзначыў сіноптык.
Паводле яго слоў, у пачатку тыдня ўмовы надвор'я будзе вызначаць вобласць павышанага атмасфернага ціску, сфарміраванага ў вільготнай паветранай масе.
У аўторак, 31 снежня, у асобных раёнах невялікія ападкі (дождж, мокры снег). Месцамі туман, слабы галалёд, на дарогах галалёдзіца. Тэмпература паветра на працягу сутак мінус 3°С — плюс 3°С, ноччу пры праясненнях мінус 4—6°С.
У сераду ў асобных раёнах невялікія ападкі (мокры снег, дождж), туман, галалёд, на дарогах галалёдзіца. Тэмпература паветра ноччу мінус 5°С — плюс 1°С, днём мінус 3°С — плюс 3°С.
«У чацвер і пятніцу на фоне павышанага атмасфернага ціску будуць перамяшчацца слаба выяўленыя франтальныя падзелы ад далёкіх цыклонаў у Нарвежскім моры», — адзначыў Рабаў.
У чацвер месцамі кароткачасовыя ападкі, галоўным чынам снег, мокры снег, туман, галалёд, на дарогах галалёдзіца. Тэмпература паветра ноччу мінус 5°С — плюс 1°С, днём мінус 3°С — плюс 2°С.
У пятніцу ў асобных раёнах невялікі снег. Тэмпература паветра ноччу 0°С — мінус 5°С, днём мінус 3°С — плюс 2°С.
У суботу месцамі снег, мокры снег, днём з дажджом, туман, галалёд, на дарогах галалёдзіца. Тэмпература паветра ноччу мінус 4°С — плюс 1°С, днём мінус 2°С— плюс 3°С.
У нядзелю месцамі кароткачасовыя ападкі (мокры снег, дождж), туман, галалёд, на дарогах галалёдзіца. Тэмпература паветра ноччу мінус 4°С — плюс 2°С, днём мінус 2°С — плюс 4°С.
У Мінску ў найбліжэйшыя суткі пахмурна з праясненнямі, без істотных ападкаў. Месцамі слабы туман, на асобных участках дарог галалёдзіца. Вецер паўднёва-заходні 3—8 м/с. Тэмпература паветра ноччу 0°С — мінус 2°С, днём 0°С — плюс 2°С.
У навагоднюю ноч мінус 1°С — мінус 3°С, днём 0°С — мінус 2°С, магчымы невялікія ападкі ў выглядзе мокрага снегу.
Каментары