У матчы першага круга 2-й групы Еўра-Афрыканскай зоны Кубка Дэвіса беларускія тэнісісты перамаглі каманду Ірландыі з лікам 4:1. Сустрэча прайшла на закрытым корце Рэспубліканскага цэнтра алімпійскай падрыхтоўкі па тэнісе ў Мінску.
31 студзеня Дзмітрый Жырмонт (314-е месца ў адзіночным рэйтынгу АТП) выйграў у Дэніэла Глэнсі (723) — 6:2, 6:4, 6:2, а Ягор Герасімаў (252) узяў верх над Джонам Морысі (без рэйтынгу) — 6:4, 6:1, 6:2.
1 лютага Максім Мірны (26-е месца ў парным рэйтынгу) і Аляксандр Буры (212) перамаглі Джэймса Класкі (152) і Дэвіда О`Хара (без рэйтынгу) — 6:7 (3:7), 7:6 (8:6), 5:7, 7:6 (10:8), 6:2.
2 лютага ў першым матчы дня Герасімаў быў мацнейшы за Глэнсі — 6:3, 6:3. У другім на корт замест Жырмонта выйшаў не заяўлены за гаспадароў Ілья Івашка (770), таму беларускай зборнай было залічана тэхнічнае паражэнне, а паядынак Івашкі з Морысі насіў выставачны характар і ў залік Кубка Дэвіса не ўвайшоў. Беларускі спартсмен быў мацнейшы — 6:4, 7:6 (8:6).
«Мы свядома аддалі ірландцам ачко, але набылі значна больш: магчымасць абкатаць маладога гульца», — адзначыў капітан зборнай Беларусі Уладзімір Ваўчкоў на прэс-канферэнцыі пасля заканчэння матчу. Паводле яго слоў, у адрозненне ад сітуацыі дзесяцігадовай даўнасці ў зборнай ёсць лаўка запасных — «гульцы, гатовыя паказваць тэніс, які адпавядае групе Кубка Дэвіса, у якой мы выступаем». Менавіта таму, падкрэсліў Ваўчкоў, яму цяжка сказаць, ці выступяць у другім крузе ў красавіку тэнісісты, якія выходзілі на корт цяпер.
Як адзначыў капітан гасцей Гэры Кэхіл, самай цікавай была парная сустрэча, а ў асобных клас сапернікаў занадта адрозніваўся. «Яшчэ было вельмі «хуткае» пакрыццё, у Ірландыі такога няма. Але гэта не можа служыць нам апраўданнем», — заявіў капітан.
У матчы за выхад у плэй-оф 2-й групы Еўра-Афрыканскай зоны Кубка Дэвіса беларускія тэнісісты сустрэнуцца ў гасцях з камандай Малдовы. 2 лютага ў першым раўндзе малдаване датэрмінова выйгралі ў Кішынёве ў Егіпта - 3:1.
Сустрэча Малдова—Беларусь пройдзе 4—6 красавіка. Пераможца пары згуляе з лепшым у супрацьстаянні Данія—Люксембург.
У рэйтынгу Кубка Дэвіса Беларусь займае 53-е месца, Малдова — 49-е.
Каментары