Ахоўнае прадпісанне для ахвяр гвалту ў сям'і ўводзіць закон «Аб асновах дзейнасці па прафілактыцы правапарушэнняў», які набывае моц 16 красавіка, паведаміў начальнік упраўлення прафілактыкі Міністэрства ўнутраных спраў Алег Каразей на прэс-канферэнцыі ў Мінску 14 красавіка.
Паводле яго слоў, ахоўнае прадпісанне будзе прымяняцца да чалавека, які ўчыніў правапарушэнне ў сферы сямейных адносінаў паўторна на працягу года.
У выпадку калі ахвяра гвалту пакідае агульнае жыллё, гвалтаўніку ставіцца ў абавязак не ісці з ёю на кантакт. Забаронена рабіць спробы высвятляць месца знаходжання ахвяры, наведваць месцы яе знаходжання, размаўляць з пацярпелымі ад гвалту ў сям'і, у тым ліку па тэлефоне, з выкарыстаннем інтэрнэта.
У выпадку калі ахвяра гвалту застанецца ў агульным жыллі, правапарушальніку ставіцца ў абавязак пакінуць яго і не шукаць з ахвярай ніякіх кантактаў. Гвалтаўнік таксама пазбаўляецца права распараджацца агульнай з ахвярай уласнасцю.
Ахоўныя прадпісанні выносяцца на працягу трох дзён і могуць дзейнічаць ад трох да 30 сутак. Калі ахвяра на нейкім этапе вырашыць дараваць вінаватаму ў гвалце, прадпісанне будзе знятае.
Каразей адзначыў, што закон прадпісвае мясцовым выканаўчым органам ствараць крызісныя пакоі як для ахвяр гвалту, так і забяспечваць месцамі часовага знаходжання грамадзян, у дачыненні да якіх вынесена ахоўнае прадпісанне ў адпаведнасці з парадкам, устаноўленым Саветам міністраў. Гэты парадак, сказаў прадстаўнік МУС, яшчэ не вызначаны, хаця праект пастановы «падрыхтаваны МУС і ўзгоднены з усімі зацікаўленымі бакамі».
У сувязі з гэтым начальнік упраўлення па наглядзе за выкананнем заканадаўства і законнасцю прававых актаў Генеральнай пракуратуры Павел Радзівонаў адзначыў, што для таго, каб закон дзейнічаў, неабходна ствараць пэўныя ўмовы. «Напрыклад, чалавеку вынесена забарона наведваць уласны дом на працягу двух тыдняў. У такім выпадку павінны быць прадугледжаныя месцы часовага знаходжання, якія павінны быць створаныя, каб закон працаваў. Толькі тады можна будзе ўносіць ахоўныя прадпісанні», — сказаў ён.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі26
Каментары