У Нясвіжы за антываенную акцыю затрымана актывістка БХД Наталля Бордак
У Нясвіжы 9 мая за антываенную акцыю была затрымана актывістка аргкамітэта па стварэнні партыі «Беларуская хрысціянская дэмакратыя» з Нясвіжа Наталля Бордак, паведамляе прэс-служба арганізацыі.
Пра сваё затрыманне яна сказала ў смс-паведамленні свайму знаёмаму Аляксандру Язвінскаму. «Я ва ўчастку за плакат «Не пуцінскай вайне з Украінай», — напісала яна.
Тэлефон Бордак не адказвае, яе месцазнаходжанне невядомае. Язвінскі мяркуе, што актывістка застанецца пад вартай да панядзелка, калі яе, магчыма, чакае суд.
Напярэдадні адкрыцця і падчас чэмпіянату свету па хакеі ў Беларусі прайшлі масавыя адвольныя затрыманні і арышты грамадскіх актывістаў. Паводле заявы праваабаронцаў, іх затрымліваюць выключна па сфабрыкаваных і аднатыпных абвінавачаннях «Дробнае хуліганства», «Непадпарадкаванне супрацоўнікам міліцыі». Усяго затрымана ці арыштавана ўжо каля 30 чалавек, некаторых актывістаў апазіцыі міліцыя працягвае вышукваць.
Каментары