Суд Першамайскага раёна Віцебска вынес прыгавор па крымінальнай справе па абвінавачанні грамадзяніна Малдовы ва ўчыненні злачынстваў, прадугледжаных ч. 1 арт. 14, ч. 4 арт. 212, арт. 352 КК.
Як паведамілі ў Вярхоўным судзе Беларусі, абвінавачваны двойчы 19 сакавіка і ў ноч на 15 чэрвеня 2013 года сумесна з групай суайчыннікаў, выкарыстоўваючы загадзя вырабленыя падробленыя плацежныя карткі, рэквізіты якіх некалькімі тыднямі раней былі скапіяваны імі ж з магнітных палос картак пацярпелых пры дапамозе скімінгавых прылад, устаноўленых на картапрыёмнікі банкаматаў, спрабавалі зняць грашовыя сродкі з рахункаў грамадзян у банкаматах рэспублікі.
Агульная сума грашовых сродкаў, якую ўдалося выкрасці злачынцам з рахункаў пацярпелых, склала больш за мільярд рублёў. Выкрадзеныя такім чынам грошы большасці пацярпелых былі вернуты банкамі, кліентамі якіх яны з'яўляліся.
Пакуль перад судом адказвае толькі адзін абвінавачваны, астатнія саўдзельнікі знаходзяцца ў вышуку, двое з іх затрыманы ў Расіі па падазрэнні ва ўчыненні аналагічных злачынстваў.
Прыгаворам суда абвінавачваны прызнаны вінаватым у замаху на крадзеж маёмасці шляхам увядзення ў камп'ютарную сістэму лжывай інфармацыі, спалучанай з несанкцыянаваным доступам да камп'ютарнай інфармацыі, учыненым паўторна, групай асоб па папярэдняй змове, у асабліва буйным памеры. На падставе ч.1 арт. 14 і ч. 4 арт. 212 КК яму прызначана пакаранне тэрмінам на дзевяць гадоў шэсць месяцаў пазбаўлення волі з канфіскацыяй маёмасці без пазбаўлення права займаць пэўныя пасады ці займацца пэўнай дзейнасцю, а таксама ў несанкцыянаваным капіяванні інфармацыі, якая захоўваецца ў камп'ютарнай сістэме і на машынных носьбітах, што пацягнула прычыненне істотнай шкоды, і на падставе арт. 352 КК яму прызначана пакаранне ў выглядзе года пазбаўлення волі.
У адпаведнасці з ч. 3 арт. 72 КК па сукупнасці злачынстваў, шляхам частковага складання прызначаных пакаранняў, судом канчаткова прызначана абвінавачванаму пакаранне ў выглядзе 10 гадоў пазбаўлення волі з адбываннем пакарання ў папраўчай калоніі ва ўмовах узмоцненага рэжыму з канфіскацыяй маёмасці без пазбаўлення права займаць пэўныя пасады ці займацца пэўнай дзейнасцю.
Прыгавор раённага суда быў вынесены 10 чэрвеня. Ён абскарджаны ў касацыйным парадку.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне13
Каментары