Рада Еўрасаюза выключыла восем прозвішчаў са спіса прадстаўнікоў Беларусі, у дачыненні да якіх дзейнічаюць санкцыі, паведамляе прэс-служба Рада ЕС.
Так, з чорнага спіса выключаны:
- былы пракурор Мінскай вобласці Аляксандр Архіпаў;
- суддзя суда Фрунзенскага раёна горада Мінска Ганна Самалюк;
- старшыня Магілёўскай рэгіянальнай выбарчай камісіі Валерый Берастаў;
- член ЦВК Наталля Бушная;
- пракурор Андрэй Мігун;
- былы намеснік старшыні КДБ Мікалай Свароб;
- намеснік старшыні КДБ Пётр Траццяк;
- былы начальнік упраўлення ўрадавай сувязі КДБ Ігар Варапаеў.
Разам з тым у спіс дабаўлены суддзя шклоўскага раённага суда Віталь Волкаў.
У студзені 2012 года прыняў рашэнне аб пераводзе экс-кандыдата ў прэзідэнты Беларусі Мікалая Статкевіча ў турму закрытага тыпу ў Магілёве на падставе таго, што Статкевіч нібыта парушаў правілы зняволення ў папраўчай калоніі № 17 Шклова. «Гэта рашэнне прывяло да парушэння правоў Статкевіча, у тым ліку да пазбаўлення сну і пагрозы здароўю», — гаворыцца ў афіцыйным паведамленні.
«У святле сур'ёзнай занепакоенасці ў сферы правоў чалавека, адзін чалавек дададзены ў спіс санкцый, — гаворыцца ў паведамленні. — Разам з тым рада мяркуе, што больш няма падстаў для знаходжання ў гэтым спісе васьмі чалавек».
Нагадаем, Еўрасаюз аднавіў дзеянне санкцый у дачыненні да Беларусі пасля жорсткага разгону дэманстрацыі 19 снежня 2010 года.
29 кастрычніка 2013 года дзеянне санкцый працягнулі на год - да 31 кастрычніка 2014 года. «Гэта адбылося ў сувязі з тым, што палітычныя вязні да гэтага часу не вызваленыя, а паляпшэнняў у сферы павагі правоў чалавека, вяршэнства закона і дэмакратычных прынцыпаў у Беларусі не назіраецца», - гаварылася тады ў паведамленні прэс-службы ЕС.
Пасля перагляду санкцый у спісе асоб, якім забаронены ўезд на тэрыторыю ЕС і чые фінансавыя сродкі ў ЕС павінны быць замарожаныя, 232 прозвішчы.
Акрамя таго, санкцыі працягваюць дзейнічаць у дачыненні да 25 беларускіх прадпрыемстваў.
Цяпер чытаюць
Цэны на паліва павышаюцца на 4 капейкі, а праз тыдзень яшчэ на тры1
Каментары