Эпатажны спявак Oliver Tree і яшчэ пяць чалавек загінулі ў Бразіліі пасля сутыкнення верталётаў
Папулярны амерыканскі музыка і рэжысёр Олівер Тры не дажыў да свайго 33‑годдзя ўсяго два тыдні. Авіякатастрофа, у якой загінулі яшчэ пяць чалавек, здарылася на паўднёвым захадзе Рыа-дэ-Жанэйра.
Інфармацыю пра смерць музыкі паведаміла бразільскае выданне CNN Brasil, пазней яе пацвердзіла мясцовая паліцыя.
Вядома, што Олівер Тры знаходзіўся ў Бразіліі ў межах свайго сусветнага турнэ — у пачатку чэрвеня ён выступіў у Сан-Паўлу, а ў ліпені павінна была пачацца еўрапейская частка гастроляў. Сярод ахвяр таксама папулярны аргенцінскі ютубер Гаспар Прым.
Шлях ад ска-панка да сусветнай славы
Олівер Тры Нікел нарадзіўся ў каліфарнійскім горадзе Санта-Круз. Яго шлях у музыку быў незвычайным і разнастайным: з трох гадоў ён браў урокі фартэпіяна, а ўжо ў падлеткавым узросце паспеў пайграць у ска-панк-гурце і выступіць на разагрэве ў такіх зорак, як Tyler, the Creator і Frank Ocean.
Сапраўдны прарыў адбыўся ў 2017 годзе, калі яго песня «When I'm Down» стала віруснай у інтэрнэце. Пасля гэтага з ім падпісаў кантракт буйны лэйбл Atlantic Records. Шырокую вядомасць прынеслі суперхіты «Life Goes On» і «Miss You», а таксама дэбютны альбом Ugly Is Beautiful, які выйшаў у 2020 годзе. На Spotify у яго было больш за 11 мільёнаў слухачоў штомесяц, а некаторыя трэкі збіралі больш за 700 мільёнаў праслухоўванняў.
Олівер Тры вызначыўся не толькі музыкай, але і яркім эпатажным вобразам. Яго фірмовымі рысамі сталі характэрная прычоска-«гаршчок», джынсы-клёш і вятроўкі крыклівых колераў з 90-х. Акрамя музыкі, ён актыўна займаўся рэжысурай, здымаючы ўласныя кліпы і камедыйныя скетчы. Напрыклад, для здымак відэа на песню «Hurt» ён паехаў ва Украіну і выдаткаваў на прадакшн мільён даляраў.
У 2021 годзе ён выпусціў сумесны міні-альбом Welcome to the Internet з расійскім рэйв-гуртом Little Big, запісаўшы адзін з трэкаў разам з эпатажным эстонскім рэперам Tommy Cash. За сваю кар'еру ён паспеў выпусціць тры студыйныя альбомы, а яго музыка выкарыстоўвалася нават у рэкламе iPhone X.
Цяпер чытаюць
У Мінску масажыст Андрэй таемна здымаў голых кліентак24
Каментары