Удзельнікі памінаньня запалілі сьвечкі ля капліцы ў парку імя Чалюскінцаў і ў Курапатах.
29 лістапада ў Мінску, у парку імя Чалюскінцаў і ва ўрочышчы Курапаты, адбылося традыцыйнае памінанне ахвяр сталінізму, арганізаванае грамадскім аргкамітэтам па ўвекавечанні памяці ахвяр сталінскіх рэпрэсій.
Удзельнікі памінання запалілі свечкі ля капліцы ў парку імя Чалюскінцаў і ў Курапатах — ля Крыжа пакутаў, Лавы «Клінтана», мемарыяльнага каменя са словамі «Ахвярам сталінізму», памятных знакаў палякам і яўрэям, якія загінулі ў гады сталінскага тэрору.
Як зазначыў сустаршыня аргкамітэта пісьменнік Васіль Якавенка, у новым годзе аргкамітэт працягне сваю работу ў складзе мемарыяльнай секцыі РГА «Беларускае добраахвотнае таварыства аховы помнікаў гісторыі і культуры». Паводле яго слоў, прадугледжваецца адкрыццё новых памятных знакаў на месцах масавага знішчэння і пахавання бязвінных людзей, устанаўленне імён невядомых ахвяр сталінізму і складанне поўнага спіса вёсак, у якіх праводзіліся масавыя рэпрэсіі, а таксама публікацыя новых матэрыялаў па тэме бальшавіцкага тэрору.
Сакратар аргкамітэта Уладзімір Раманоўскі зазначыў, што дзейнасць аргкамітэта «заклікана абудзіць грамадства да асэнсавання ўрокаў гісторыі і садзейнічаць аднаўленню маральных асноў шанавання памяці загінулых людзей». Паводле яго слоў, народ асуджаны на страту незалежнай нацыянальнай дзяржавы, «калі людзі будуць жыць толькі сённяшнім днём і не змогуць адчуць сябе звяном у гістарычным ланцугу пакаленняў беларусаў, у якіх ёсць мінулае, сучаснае і будучыня».
Прадстаўнікі сілавых структур не перашкаджалі правядзенню памінання.
Каментары