Грамадскі актывіст Андрэй Кашэўскі атрымаў 15 сутак за майку «Свабоду палітзняволеным»
Грамадскі актывіст Андрэй Кашэўскі прыгавораны судом Савецкага раёна Мінска да 15 сутак адміністрацыйнага арышту.
Як паведамляе праваабарончы сайт spring96.org, Кашэўскі быў затрыманы 9 кастрычніка каля сталічнага ЦУМа. На ім была майка з надпісам «Свабоду палітзняволеным», на якой таксама былі пералічаны прозвішчы беларускіх вязняў сумлення.
На Кашэўскага былі складзены тры пратаколы аб адміністрацыйных правапарушэннях: па арт. 17.1 (дробнае хуліганства), арт. 23.34 (несанкцыянаванае масавае мерапрыемства) і арт. 23.4 (непадпарадкаванне супрацоўнікам міліцыі). Да суда, які адбыўся 10 кастрычніка, актывіста пакінулі ва ўчастку.
У знак пратэсту супраць судовага рашэння Кашэўскі праводзіць акцыю маўчання.
Праваабаронцы паведамляюць, што гэта трэцяя сёлета адміністрацыйная справа супраць Кашэўскага. Апрача таго, яго двойчы змяшчалі ў Рэспубліканскі цэнтр псіхічнага здароўя ў Навінках.
Зазначым, што апазіцыйныя і праваабарончыя арганізацыі адзначаюць сістэматычнае выкарыстанне ўладамі прэвентыўных затрыманняў актывістаў у Беларусі напярэдадні важных грамадскіх падзей. У сувязі з больш частымі адвольнымі затрыманнямі і арыштамі апазіцыйных актывістаў 15 кастрычніка ў Мінску адбудзецца прэс-канферэнцыя, на якой праваабаронцы аб'явяць аб правядзенні адпаведнай кампаніі.
Каментары