Фестываль Дыяны Перно «A Shaded View on Fashion Film» абраў найлепшыя модныя кароткаметражкі. У розных намінацыях было ўзнагароджана 9 міні-фільмаў.
Уладальнікам гран-пры ASVOFF гэтага года стаў фільм «Jumper», зняты Джасцінам Андэрсанам (Justin Anderson).
Падаецца, што фільм апавядае больш пра кансумпцыю і нашыя парыванні, чым пра моду. Голы мужчына, якога прагне ўся сям'я, паказаная ў фільме, спрашчае тэму моды менавіта да прагі.
Кадр з фільму «Jumper»
За найлепшую рэжысуру ўзнагародзілі кароткі метр Монікі Менес (Monica Menez) для «S Moda», у якім чароўная Лаура Понтэ (Laura Ponte) шукае сабе мужчыну. У пэўны момант падаецца, што модны свет злучаецца з процілеглым, але не. Проста падалося. Фільмік пра экстрэмальна каварную прыгажосць і ўменне маніпуляваць светам праз выгляд, настрой (з дапамогай музыкі), штучную ўсмешку і … змяіную мову.
Кадр з фільма «S Moda»
У намінацыі «Найлепшая гульня» перамог маналог, які быў зняты Лаурай Хіпонен (Laura Hypponen). Не буду раскрываць таямніцу гэтага міні-фільма, які мяне прыемна здзівіў нечаканым падыходам да тэмы. А менавіта да герметычнасці вобразаў, якія паўстаюць, дзякуючы моднаму свету. Спрашчаючы, можна выглядаць як спявачка Рэана, але не мець голаса.
У намінацыі «Найлепшая стылізацыя» перамаглі Сафія Санчэс і Маўра Мангіела (Sofia Sanchez & Mauro Mongiello) з міні-фільмам «Guinevere van Seenus». На 100% антымодная кароткаметражка.Можа, пра стомленасць ад пластыкавага жыцця? Ці пра тое, што не ўсведамляеш, што жывеш сярод прыгожай штучнасці, бо ўвесь час нешта робіш, робіш.
Кадр з фільма «Guinevere van Seenus»
У намінацыі «Найлепшы дызайн гуку» перамагла праца маркі, якая закаханая ў мінімалізме, — СОS. І у гэтым роліку гукі моды адкрываюцца перад намі ў камічным фармаце.
Кадр з фільма «The Sound of Cos»
«За прыгажосць» быў адзначаны міні-фільм Мэры Шулер (Marie Schuller). Кароткаметражка спрабуе эмацыйна адлюстраваць жанчыну. І мода тут ні пры чым!
Кадр з фільма «Barbara Casasola: menswear for women»
А найлепшым новым талентам аказаўся міні-фільм пра тэлефонныя стасункі Джейкаба Браўна (Jacob Brown), а можа, нават глабальней — пра сучасныя стасункі. І калі б не модныя рэчы і акцэнты на «моднасць» герояў гэтага міні-фільма, то ён мог бы быць паказаны зусім на іншым фестывалі.
Кадр з фільма «Connecting»
Агульнае ўражанне ад прагляду гэтых кароткіх 9 міні-фільмаў такое, што моду вельмі складана выхапіць з рэчаіснасці. Яна з’яўляецца часткай нас. Калі мы не аголеныя — мы пачынаем эксперыментаваць. «Эксперымент» — гэта ключавы хэштэг моды.
Фестываль моднага кіно «A Shaded View on Fashion Film» быў заснаваны журналісткай Дыянай Перно ў 2008 годзе. Тады ён ішоў усяго тры дні ў парыжскай Нацыянальнай галерэі Jeu de Paume. Зараз праграма ASVOFF стала куды шырэйшай — фестываль абзавёўся асобнымі конкурснымі і дакументальнымі праграмамі. У гэтым годзе ён праходзіць ужо ў 7-ы раз.
Цяпер чытаюць
Акадэмію КДБ будуюць проста на Залатагорскіх могілках. З зямлі дастаюць парэшткі мінчукоў, якіх тут хавалі сотні гадоў10
Каментары