Кліп аднаногай спявачкі за выходныя праглядзелі 8 млн раз ВІДЭА
«Новы кшталт поп-артыста», — кажа надпіс на пачатку кліпа «Prototype» мадэлі-інваліда Вікторыі Мадэсты. Відэа паказаў у прайм-тайм брытанскі тэлеканал Channel 4, за выходныя кліп набрала шалёную папулярнасць на Facebook.
Шасціхвілінны ролік нагадвае кліпы Лэдзі Гага. Відэашэраг з намёкамі на дыктатарскі рэжым і стужку «V значыць вендэта» пачынаецца пад матыў уступу «Show Must Go On» гурта Queen, сама жа песня выкананая ў модным стылі R’n’B.
Кліп «Prototype» паказалі па Channel 4 ў перапынку шоў X-Factor, які глядзяць блізу 10 мільёнаў чалавек, адзначае The Guardian. Паказ рэкламы ў гэтым перапынку каштуе 200 тысяч фунтаў.
Мадэста распаўсюджвае маніфест: некаторыя народжаныя, каб быць іншымі, некаторыя народжаныя, каб рызыкаваць.
«Пераадоленне інваліднасці ў спорце робіць чалавека героем, але ў поп-культуры няма месца такім пачуццям», — кажа яна.
Сама Мадэста называе сябе «першым у свеце біянічным артыстам» і з гонарам распавядае пра разнастайныя пратэзы, якія не толькі не замінаюць ёй рухацца, але і пакідаюць яе сэксуальнай.
***
Вікторыя Маскалёва Мадэста нарадзілася ў Даўгаўпілсе (Латвія) у 1988 г. Праз нядбайнасць дактароў з нараджэння мела траўму нагі, у 2007 годзе пагадзілася на ампутацыю.
З 15 гадоў была мадэллю. Яе партрэт у стылі ню прадстаўляўся ў лонданскай Нацыянальнай партрэтнай галерэі, яна здымалася ў кліпах Paloma Faith і Peaches. У 2009 годзе запусціла музычны праект з Нікам Ходжэсам. Дэбютны самотнік «Only You» выпусціла ў маі 2009 года. На цырымоніі закрыцця Паралімпіяды ў Лондане выступала з пратэзам нагі, упрыгожаным крышталямі Swarovski.
Каментары