Прычына харчовага канфлікту з Расіяй у тым, што расійскае харчаванне не можа канкурыраваць з беларускім «ні па якасці, ні па цане», лічыць Аляксандр Лукашэнка.
На яго думку, спрэчкі будуць узнікаць з-за сутыкнення з інтарэсамі расійскіх вытворцаў, якія бачаць у беларускіх першарадных канкурэнтаў. «Яны не могуць з намі канкурыраваць ні па якасці, ні па цане, ні па нашай арганізаванасці. Таму ўжываюць такія адміністрацыйныя, часам бандыцкія метады. Мы да гэтага гатовыя. Мы людзі загартаваныя», — цытуе Лукашэнку дзяржаўнае агенцтва БелТА.
Падчас сустрэчы 29 снежня з журналістамі ў Мінску ён паведаміў, што абмяркоўваў праблемы з пастаўкамі беларускай прадукцыі з Уладзімірам Пуціным. Гутарка, паводле слоў Лукашэнкі, атрымалася «жорсткай, але крайне дзелавой». «Гэта гаворыць не аб тым, што ў нас антаганізм. Мы проста сябры, і мы адзін аднаму можам сказаць у адкрытую тое, што нас хвалюе», — дадаў кіраўнік дзяржавы.
«Тое, што гэта не паўторыцца, такога, напэўна, не можа быць. Гэта толькі ў казцы можа здарыцца, што ў нас надалей не будзе нейкіх спрэчак», — сказаў ён.
Пры гэтым Лукашэнка ўпэўнены ў тым, што фармат Саюзнай дзяржавы ва ўзаемаадносінах Беларусі і Расіі сябе ні ў якім разе не вычарпаў. «У Еўразійскім эканамічным саюзе дай бог нам яшчэ дасягнуць той глыбіні інтэграцыі, як у нас з Расійскай Федэрацыяй. Гэтага пакуль і блізка няма», — заявіў ён.
Цяпер чытаюць
«Лічу, што гэта мая місія». Беларускамоўны Павел з ДЦП выклікаў хвалю захаплення, зайздрасці і любові4
Каментары