Рымска-каталіцкі касцёл у Беларусі дамогся рэгістрацыі ўласнай вышэйшай навучальнай ўстановы — Мінскай тэалагічнай акадэміі імя святога Яна Паўла ІІ. Адпаведныя дакументы на рэгістрацыю былі падпісаныя 17 лютага, паведамляе афіцыйны партал касцёла catholic.by.
Зарэгістраваць сваю ВНУ касцёл спрабаваў тройчы. Ад моманту рэгістрацыі акадэмія з`яўляецца юрыдычнай асобай, якая дзейнічае паводле зацверджанага статута. Навучанне ў ВНУ будзе весціся ў двух напрамках: падрыхтоўка каталіцкіх святароў і тэалагічная адукацыя свецкіх асобаў.
«Пакуль што новая ўстанова не мае свайго будынка, таму яна была зарэгістраваная ў адным з дамоў, якія належаць да дабрачыннай арганізацыі «Карытас» Мінска-Магілёўскай архідыяцэзіі. Мінская акадэмія павінна знаходзіцца ў Мінску. Мы не хацелі б зацягваць з яе будаўніцтвам, але спачатку трэба атрымаць дазвол на будаўніцтва акадэміі», — цытуе каталіцкі партал мітрапаліта Мінска-Магілёўскага арцыбіскупа Тадэвуша Кандрусевіча.
Хуткім часам уладам сталіцы будуць перададзеныя дакументы з просьбай аб выдзяленні зямлі пад будаўніцтва гэтай акадэміі, пасля пачнецца этап стварэння праекта, які неабходна будзе узгадніць у шэрагу профільных дзяржаўных органаў.
«Ужо шмат гадоў людзі выказвалі свае пажаданні мець у Мінску вышэйшую каталіцкую навучальную ўстанову. Сёння такая магчымасць ажыццяўляецца. Мінск — гэта сталіца Беларусі. Тут сканцэнтраваны яе навуковы і культурны патэнцыял, які будзе ўзбагачаны акадэміяй. Тэалагічная акадэмія падыме імідж Беларусі і будзе спрыяць далейшаму развіццю беларускай культуры, абагачаючы яе духоўным зместам. Гэта важна для касцёла, якому патрэбныя свае якасна падрыхтаваныя святары і свецкія асобы. Гэта важна таксама і для сталіцы, а таксама для нашай краіны», — падкрэсліў арцыбіскуп Кандрусевіч.
Цяпер чытаюць
Музыка Цім Суладзэ: Розніца 30 гадоў — тое, што адпавядае маім уяўленням пра адносіны38
Каментары