У топе з беларусаў IBA Group, Intetics, Itransition і Oxagile. EPAM чамусьці няма.
Міжнародная асацыяцыя прафесіяналаў у галіне аўтсорсінгу (IAOP) апублікавала чарговы штогадовы топ-100 аўтсорсінгавых IT-кампаній.
З самага першага рэйтынгу IAOP, складзенага ў 2006 годзе, у топ-100 прысутнічала кампанія EPAM. У 2015 годзе яе ўпершыню няма ў спісе.
У сотню трапілі чатыры беларускія IT-кампаніі — IBA Group, Intetics, Itransition і Oxagile.
Прычыны знікнення EPAM з топ-100 невядомыя. Толькі месяц таму 6,6% акцый EPAM набыў буйны інвестар JP Morgan, адна з найстарэйшых амерыканскіх інвестыцыйных кампаній з актывамі на 2,4 трлн даляраў.
У адрозненне ад папярэдніх гадоў, кампаніі ў топ-100 размеркаваныя не па месцах, а ў алфавітным парадку. Пры складанні топ-100 IAOP выстаўляе кампаніям адзнакі па ключавых крытэрах: якасць паслуг, памер, рост, інавацыі, карпаратыўная адказнасць. Вырашэнні прымае экспертная камісія IAOP.
IAOP яднае 120 тысяч кліентаў, пастаўшчыкоў і кансультантаў у галіне ІТ-аўтсорсінгу — распрацоўцы, падтрымцы і абслугоўванні праграмнага забеспячэння па замове баковай арганізацыі.
Каментары