Да сталіцы Чэхіі даехалі 20 прапуцінкіх байкераў, але гэта былі пераважна македонцы, а не расейцы.
Актывіст «Праскага Майдану» чэх Томаш Пяшынскі сьцьвярджае, што яго зьбілі за падтрымку Ўкраіны на Альшанскіх могілках падчас правядзеньня там акцыі расейскіх байкераў.
Самі ж матацыклісты выявіліся ў асноўным не расейцамі, а македонцамі. Але ім не хапала ў сталіцы Чэхіі мясцовай падтрымкі.
У пацярпелага разадраная рука:
«Яны напалі на мяне тут, расейцы. Ну, гэтыя, калябарацыяністы — ня быў расеец, гэта быў чэх. Ён цяпер стаіць сьціплы: «Прабачце», але як ён мяне тут прыціснуў да сьцяны, свалата», — кажа Томаш Пяшынскі, чэскі актывіст.
Бойцы папярэднічала эмацыйная сварка з прарасейскімі актывістамі, якія прыйшлі на Альшанскія могілкі ў Празе разам з байкерамі, якія называюць сябе «Начнымі ваўкамі». На гэтых могілках ёсьць пахаваньні савецкіх воінаў часоў Другой сусьветнай вайны.
Байкераў у Прагу прыехала каля двух дзясяткаў. Але большасьць зь іх выявіліся грамадзянамі Македоніі — 11 чалавек, яшчэ адзін прыехаў з Бэрліну. Ім шэнгенскія візы непатрэбныя.
«У нас не было ніякіх праблемаў у дарозе. Прайшлі так, таму што нам не патрэбныя візы. Праехалі ад Македоніі, затым Вэнгрыя, Славакія і цяпер у Празе», — патлумачыў матацыкліст з надпісам «Македонія» на футболцы на рускай мове з акцэнтам.
Колькі ў групе байкераў менавіта расейскіх «ваўкоў», якія даехалі да Прагі з Масквы, лідэр калектыву Максім Новікаў адказаць адмовіўся:
«Гэтую інфармацыю я пакуль Вам назваць не магу, — сказаў Новікаў. — Я далучыўся да калёны ўжо ў Германіі. Я з Бэрліна. Таму мне ня трэба было прабівацца празь мяжу».
Не патлумачыў лідэр «ваўкоў» і таго, як удалося байкерам з Расеі перасячы мяжу Эўразьвязу — нягледзячы на тое, што Польшча забараніла частцы зь іх праезд па сваёй тэрыторыі. А чалавек, які назваўся чальцом групы суправаджэньня байкераў і жыхаром Масквы, сказаў Радыё Свабода, што калёна заехала ў Эўразьвяз «празь іншую краіну». Аднак празь якую менавіта, назваць адмовіўся.
Мэтай акцыі, паводле словаў байкераў, зьяўляецца ўскладаньне кветак да магіл савецкіх салдат, якія загінулі ў Другую сусьветную вайну пры вызваленьні Чэхаславакіі.
Па словах чэскага актывіста Томаша Пяшынскага, байкеры толькі прыкрываюцца ўшанаваньнем загінулых воінаў:
«Гэта прапагандысцкая акцыя рэжыму Ўладзімера Пуціна. Апраўдваюцца прыкрыцьцём аб наданьні павагі памерлым, але яны пра гэта не клапоцяцца. Гэта проста прапаганда расейскага імпэрыялізму 21-га стагодзьдзя, і нішто іншае», — лічыць ён.
Падтрымаць Украіну прыйшла на Альшанскія могілкі таксама чэская пісьменьніца Джэні Новак.
«Я тут таму, што вырашыла выказаць падтрымку Ўкраіне, на якую напалі, і таму, што мне не падабаецца, што многія чэхі адкрыта падтрымліваюць агрэсіўны і злачынны рэжым», — кажа пісьменьніца.
З украінскімі і амэрыканскімі сьцягамі супраць прыезду «ваўкоў» на Альшанскіх могілках пратэставалі трое грамадзянаў Чэхіі. А «георгіеўскія стужачкі» на могілках дэманстравалі больш за дзьвесьце чалавек.
З прыхільнікамі пуцінскага рэжыму на могілкі прыбылі і карэспандэнты трох расейскіх тэлеканалаў.
Каментары