Злачыннасць сярод украінцаў, якія знаходзяцца ў Беларусі, вырасла амаль на 30%, паведаміў на прэс-канферэнцыі 18 чэрвеня ў Мінску начальнік дэпартамента па грамадзянстве і міграцыі МУС Аляксей Бягун.
Паводле яго слоў, увогуле злачыннасць замежных грамадзян на тэрыторыі Беларусі складае 1,2% ад агульнай колькасці ўчыненых злачынстваў у краіне. «Гэта не такая значная лічба, як у некаторых рэгіёнах Расіі, дзе яна даходзіць да 20%, або ў некаторых краінах Еўрапейскага саюза — да 50%», — канстатаваў прадстаўнік МУС.
Пры гэтым у праваахоўных органах прызнаюць існаванне праблемы з паводзінамі ўкраінскіх грамадзян на тэрыторыі Беларусі.
Паводле слоў Бегуна, асаблівасці паводзінаў украінцаў, якія прыбылі ў Беларусь, «звязаныя з іх менталітэтам, з паняццем свабоды, парадку, якія закладваліся ў іх менталітэце з прычыны пэўных акалічнасцяў».
«Калі ўкраінцы прыбываюць на тэрыторыю Беларусі, яны, асабліва на першым этапе, не разумеючы, што значыць жыць згодна з пэўнымі законамі, правіламі, што законы і правілы ніхто не павінен парушаць, што піва на вуліцы піць нельга, спрабуюць зацвердзіць свой маленькі свет, які яны перанеслі або спрабуюць сюды перанесці, спрабуюць нават педаляваць яго, уздзейнічаць на праваахоўныя органы, — зазначыў Бягун. — У прыватнасці, каб мы не прымалі рашэнні аб іх дэпартацыі, таму што яны прыбылі з зоны канфлікту, каб мы заплюшчвалі вочы на іх дробныя правапарушэнні, таму што яны не ведалі патрабаванняў заканадаўства».
Прадстаўнік МУС паведаміў, што кожны ўкраінец, які звяртаецца ў падраздзяленні па грамадзянстве і міграцыі, запаўняе апытальны ліст, і супрацоўнік міліцыі яму расказвае па пунктах, на што трэба звярнуць увагу пры знаходжанні на тэрыторыі Беларусі. Яму нават тлумачаць, што вуліцу на чырвонае святло пераходзіць нельга.
«Растлумачэннямі, мерамі прымусу — высылкай і дэпартацыяй пэўнай катэгорыі асоб — мы спрабуем хоць неяк кантраляваць сітуацыю. Не магу сказаць, што яна моцна выйшла з-пад кантролю. Былі бытавыя канфлікты, канфлікты на глебе розных палітычных поглядаў», — дадаў Бягун.
Як паведамлялася раней, за апошнія паўтара года ў Беларусь з-за ваеннага канфлікту ва Украіне прыбылі больш як 100 тыс. грамадзян гэтай краіны.
Цяпер чытаюць
Вось як выглядае з космасу асвятленне Мінска ў параўнанні з суседнімі сталіцамі ФОТАФАКТ12
Каментары