Прысуд выносілі ў адсутнасьць адвакатаў і журналістаў. Рэдактара апазыцыйнай газэты абвінавацілі ў хуліганстве і наўмысным прычыненьні шкоды здароўя.
Суд Ясамальскага раёну Баку вынес прысуд галоўнаму рэдактару апазыцыйнай азэрбайджанскай газэты «Азадлыг» («Свабода») Ганімату Західаву ў адсутнасьць адвакатаў, журналістаў і блізкіх. Яго абвінавацілі ў хуліганстве і наўмысным прычыненьні шкоды здароўя.
Разам з рэдактарам на 1,5 году быў асуджаны таксама Вусал Гасанаў, якому нібыта і нанёс шкоду Ганімат Західаў. Інцыдэнт адбыўся 7 лістапада 2007 году. Па словах відавочцаў, калі рэдактар наблізіўся да рэдакцыі «Азадлыг», маладая дзяўчына пачала выкрыкваць на яго адрас: «Хто ты такі, каб мяне абражаць!» На дапамогу ёй кінуўся малады чалавек, які адзін раз ударыў рэдактара, пасьля чаго яго адцягнулі сьведкі інцыдэнту. Пасьля гэтага маладыя людзі паехалі ў паліцыі пісаць заяву на Г. Західава. 11 лістапада журналіста арыштавалі. Пазьней высьветлілася, што Вусал Гасанаў — былы сябра апазыцыйнай партыі Народнага фронту і мае асабістыя рахункі да Західава.
Незалежныя журналісты Азэрбайджана расцанілі выпадак з рэдактарам газэты, як правакацыю, а Рада Эўропы і АБСЭ запатрабавалі ад афіцыйнага Баку спыніць перасьлед Західава.
На сёньня ў турме знаходзіцца малодшы брат Західава Сакіт. Ён асуджаны па абвінавачваньні ў захоўваньні наркотыкаў. Праваабаронцы лічаць яго справу сфабрыкаванай.
Цяпер чытаюць
Беларуска, уласніца рэстарана ў Батумі, апынулася ў цэнтры скандалу з сабакамі11
Каментары