Суседка жабрака са станцыі метро «Уручча»: Ён сляпы, непітушчы, але быў у турме
18 верасня інцыдэнт ускалыхнуў спачатку людзей у мінскім метро, а пасля і інтэрнэт. Сляпога жабрака міліцыя пацягнула за нагу проста па сходах.
У Мінску Дзмітрыя ведае, напэўна, больш людзей, чым якіх-небудзь малавядомых артыстаў з АНТ. Міласціну на станцыях метро ён просіць ўжо даўно. Часта пасажыры па душах размаўлялі з Дзмітрыем і распытвалі аб грамадскім і асабістым. Таму многіх шакавала карціна, калі людзі ў форме паспрабавалі яго затрымаць. Сляпы, няшчасны і бездапаможны чалавек у кайданках ўспрымаецца інакш, чым калі б у кайданкі закавалі звычайнага здаровага мужчыну.
Пасля сутычкі ў пераходзе заведзена крымінальная справа за супраціў міліцыі. Падазраваны — Дзмітрый А. Следчы камітэт высвятляе ўсе акалічнасці здарэння, а таксама «ступень абмежаванасці фізічных здольнасцяў» ў мужчыны.
Можа быць, у пераходзе метро Дзмітрый толькі гуляе ролю інваліда і такім чынам зарабляе грошы? Высвятляем, ці сапраўды ён з'яўляецца невідушчым.
Ва Упраўленні сацыяльнай абароны Адміністрацыі Першамайскага раёна Мінска пра Змітра нічога не ведаюць. Справа ў тым, што апошні раз афіцыйна ён быў прапісаны ў так званай ночлежке па Ваўпшасава, дзе спыняюцца людзі, якія не маюць пэўнага месца жыхарства.
Затое мужчыну неаднойчы дапамагалі ў паліклініцы №8 ва Уруччы. Крыніцы ў медустанове пацвердзілі Еўрарадыё, што Дзмітрый А. — інвалід першай групы па зроку.
Адпраўляемся ў шматпавярхоўку на вуліцы Шугаева, дзе мужчына жыве ў апошнія гады.
На ўваходзе ў яго кватэру няма вочка. Званок зламаны. З-за старых тандэтных дзвярэй брэша сабака. Падобна да таго, што клапаціцца пра жывёліну цяпер няма каму.
Стукаем у дзверы да суседзяў.
«Сацыяльным работнікам я ўжо адказала на ўсе пытанні. Ён сляпы, па-сапраўднаму сляпы. Апошнія 10 гадоў — дакладна! Ён не п'яніца. Я сама яго прыводзіла ад станцыі метро дадому. І так яго са станцыі метро да кватэры даводзілі вельмі многія людзі. цесна ён ні з кім адносін не меў», — з недаверам адказвае на пытанні Еўрарадыё адна з суседак Дзмітрыя.
Незадоўга да візіту журналіста па пад'ездзе гэтак жа прайшоўся міліцыянт.
«Некаторы час тут ён жыў з сястрой і пляменніцай. А потым жыў сам. Калісьці яму прапаноўвалі застацца ў інтэрнаце для сляпых, але ён адмовіўся, хацеў сам пра сябе клапаціцца. Ён спакойны, неагрэсіўны хлопец…» — пераконвае суседка.
Аб Змітры А. распытваем ў іншых жыхароў дома. Усе пацвярджаюць, што ён без зроку, і ўсе ведаюць, што ён збіраў міласціну ў метро.
Следчы камітэт у сваім паведамленні зрабіў акцэнт, што мужчына раней быў неаднаразова судзімы за хуліганства і маёмасныя злачынствы. Падчас бойкі, паводле звестак праваахоўнікаў, Дзмітрый укусіў аднаго з міліцыянтаў і нанёс удар левай рукой у скроневую вобласць галавы.
Каментатары ў інтэрнэце робяць акцэнт на звычайнай міласэрнасці і мэтазгоднасці. Ніякай патрэбы ў такім жорсткім затрыманні жабрака людзі не ўгледжваюць. Многія падазраюць, што ідзе перадвыбарчая зачыстка сталіцы ад «асацыяльных элементаў», каб замежныя назіральнікі не бачылі, што і ў Беларусі інваліды жабруюць.
Каментары