Сёння, 26 верасня, умовы надвор'я Беларусі будуць фарміраваць актыўныя і маларухомыя атмасферныя франты, паведамляе сайт Рэспубліканскага гідраметэацэнтра pogoda.by.
Да канца дня захаваецца дажджлівае надвор'е з навальніцамі, у асобных раёнах пройдуць моцныя ліўні. Вецер паўднёва-ўсходні з пераходам на паўночны парывісты. Максімальная тэмпература паветра складзе +13—20, па паўднёвым усходзе краіны +21—26°C.
У найбліжэйшыя суткі, 27 верасня, надвор'е па-ранейшаму будзе вызначаць актыўны маларухомы атмасферны фронт. Чакаецца воблачнае з праясненнямі надвор'е. У многіх раёнах дажджы, ноччу і раніцай на большай частцы тэрыторыі, днём па паўночным усходзе моцныя дажджы. У асобных раёнах навальніцы. У начныя і ранішнія гадзіны месцамі туман. Вецер паўночны парывісты. Тэмпература паветра мінімальная ноччу +8—14°C, максімальная днём +10—16; па ўсходзе ноччу +15—18, днём +17—21°C. Атмасферны ціск ноччу істотна не зменіцца, днём будзе расці.
Паводле звестак сіноптыкаў, 28—29 верасня надвор'е будуць вызначаць халаднаватыя і вільготныя паветраныя масы, што паступаюць з поўначы еўрапейскай часткі Расіі. Будзе пераважаць халаднаватае надвор'е, ападкаў стане менш.
У панядзелак, 28 верасня, месцамі кароткачасовыя дажджы, ноччу і раніцай туман. Тэмпература паветра ноччу +4—10, днём +10—16°C.
У аўторак, 29 верасня, ноччу ў крайніх паўночных раёнах, днём месцамі па краіне пройдуць невялікія кароткачасовыя дажджы. Ноччу і раніцай у асобных раёнах туман. Тэмпература паветра ноччу +4—9, днём +8—14°C.
Аляксей Арэшка, БелаПАН.
Каментары