Беларусь просіць у МВФ 3 мільярды даляраў і абяцае рэформы
Пра гэта сёння паведаміў міністр фінансаў Уладзімір Амарын пасля свайго выступу ў Палаце прадстаўнікоў. Ён сказаў, што Беларусь просіць у Міжнароднага валютнага фонда незвычайны крэдыт памерам 3 мільярды даляраў. Гэта тая сума, якую можа выдзеліць МВФ, зыходзячы з квотнага прынцыпу.
Гэтым разам фармат крэдыту незвычайны: не стэнд-бай, а так званы «пашыраны фармат».
Журналісты папрасілі ўдакладніць, чым адрозніваюцца гэтыя фарматы. Міністар фінансаў адказаў, што крэдыт у пашыраным фармаце прадугледжвае абавязковыя структурныя рэформы беларускай эканомікі.
На пытанне, ці гатовы праект гэтых рэформаў, міністр Амарын сказаў, што так, ён ужо гатовы і перададзены для азнаямлення экспертам Міжнароднага валютнага фонда. А калі запыталі, ці будзе гэты дакумент адкрыты для вольнага доступу, міністр сказаў, што ў гэтым ён не ўпэўнены.
Таксама ён заявіў, што Беларусь за 9 месяцаў 2015 года выплаціла па знешніх даўгах калі трох мільярдаў даляраў, і да канца года застаецца выплаціць менш як адзін мільярд.
Амарын паведаміў таксама, што ўжо падрыхтаваны праект бюджэту краіны на 2016 год. Ён звярстаны з прафіцытам бюджэту ў памеры 2% ВУП. Разлікі зыходзілі з таго, што ў наступным годзе адзін бараль нафты будзе каштаваць у сярэднім 57 амерыканскіх даляраў.
Цяпер чытаюць
Беларускія абрады, арнаменты і беларуская мова паўсюль. Як нашчадак перасяленцаў зрабіў сяло каля Байкала зноў беларускім, і чаму гэта можа хутка скончыцца1414
Каментары