У Беларусі ідзе падрыхтоўка новай генеральнай схемы развіцця прыдарожнага сэрвісу на рэспубліканскіх аўтадарогах да 2020 года, паведаміў начальнік аддзела захаванасці аўтамабільных дарог і прыдарожнага сэрвісу Міністэрства транспарту і камунікацый Сяргей Лявончык 21 кастрычніка на прэс-канферэнцыі з нагоды Дня аўтамабіліста і дарожніка.
Паводле яго слоў, завяршыць распрацоўку новай генеральнай схемы плануецца да канца 2015 года. У цэлым яна будзе ўтрымліваць табліцы з існымі аб'ектамі, аб'ектамі, якія будуюцца, і меркаванымі. Галоўнае адрозненне новай схемы — прынцып комплекснасці, які будзе закладзены ў яе аснову.
«Папярэдняя схема была разлічаная да 2015 года. Але жыццё не стаіць на месцы. Пры фарміраванні новай мы зыходзім з прынцыпу комплекснасці, гэта значыць не будзе так, што праз кожныя два-тры кіламетры размесцяцца спачатку кафэ, потым стаянка, затым АЗС. Мы спрабуем усё аб'яднаць, каб гэта быў адзін комплексны аб'ект праз кожныя 40-50 кіламетраў, дзе людзі змогуць атрымаць у адным месцы ўсе паслугі і абслугоўванне», — растлумачыў Лявончык.
Прадстаўнік Мінтранса заклікаў прадпрымальнікаў і арганізацыі, якія жадаюць збудаваць свае аб'екты, звяртацца ў Міністэрства транспарту і камунікацый і прапаноўваць сваё бачанне аб'ектаў і месцаў для іх.
«Мы будзем уключаць іх прапановы ў праграму, і яны «бязбольна» найбліжэйшым часам пачнуць будаваць гэтыя аб'екты», — адзначыў Лявончык. Паводле яго слоў, прапановы будуць прымаць у Мінтрансе да канца 2015 года, а пасля зацвярджэння схемы прадпрымальнікі змогуць выбраць з соцень варыянтаў найбольш прымальныя для сябе. Пры гэтым Мінтранс надае ўвагу таму, каб перспектыўныя аб'екты не траплялі на землі сельгаспрызначэння. Акрамя транспартнікаў у працы па выдзяленні ўчасткаў непасрэдны ўдзел бяруць аблвыканкамы і райвыканкамы.
Цяпер чытаюць
Мацкевіч: Ціханоўскую зняць, замяніць, пераабраць нельга. Не мучайцеся. Нельга — і ўсё28
Каментары