Па меншай меры два паветраныя ўдары па тэрыторыі сірыйскай правінцыі Хомс, якія былі нанесеныя 15 кастрычніка, як лічаць мясцовыя жыхары, расійскай авіяцыяй, відаць, з'яўляюцца парушэннем законаў вайны, гаворыцца ў апублікаваным у нядзелю, 25 кастрычніка, дакладзе міжнароднай праваабарончай арганізацыі Human Rights Watch.
Па словах мясцовага жыхара, на якога спасылаюцца праваабаронцы, у выніку авіяўдараў загінулі 59 цывільных асоб, у тым ліку 33 дзіцяці і камандзір мясцовай узброенай апазіцыйнай групы.
Самым смяротным стаў авіяўдар, пад які трапіў дом у вёсцы Ганта, дзе хавалася сям'я Асаф - сваякі аднаго з камандзіраў апазыцыйнай «Сірыйскай свабоднай арміі» Абу аль-Абаса. Па дадзеных відавочцаў, загінулі 46 чалавек, у тым ліку 32 дзіцяці і 12 жанчын.
Усе загінуўшыя былі мірнымі жыхарамі, дом знаходзіўся ўдалечыні ад лініі фронту і там не было вайскоўцаў, а сам аль-Абас быў на перадавой, сцвярджаюць праваабаронцы.
Са спасылкай на фатаграфіі з месца падзей HRW паведамляе, што дом, відаць, быў разбураны «вакуумнай бомбай», страты ад якой большыя, чым ад звычайных авіябомбаў такога ж памеру.
У выніку ўдару па населеным пункце Цер-Маалех была разбурана мясцовая пякарня, загінулі 13 мірных жыхароў, а таксама адзін з палявых камандзіраў «Сірыйскай свабоднай арміі», сцвярджае HRW.
15 кастрычніка сірыйскае дзяржаўнае радыё паведамляла, што авіяўдары па пазіцыях тэрарыстаў у Ганта і Цер-Маалеху наносілі «аб'яднаныя» сілы Расіі і Сірыі, нагадвае CNN. Мясцовыя жыхары ўпэўненыя, што ўдары наносілі расійскія самалёты, бо «іх гук адрозніваецца ад сірыйскіх, і, акрамя таго, яны лётаюць значна вышэй».
Расея павінна расследаваць тое, што адбылося, лічаць у Human Rights Watch.
Масква раней неаднаразова адхіляла абвінавачванні ў гібелі мірных жыхароў у выніку авіяўдараў па тэрыторыі Сірыі, называючы такія заявы элементамі інфармацыйнай вайны.
Цяпер чытаюць
«Калі шандарахне па цягніку, хто будзе лідарам дэмсіл?» Два дні з дэлегацыяй Ціханоўскай у Кіеве — што засталося за кадрам27
Каментары