Прэзентацыя: 13 лістапада ў клубе Imaguru (вул. Фабрыцыюса, 4). Пачатак а 18.30. Уваход вольны.
На пачатку лістапада Лятучы ўніверсітэт распачаў набор на ўдзел у новай адукацыйнай праграме, а 13 лістапада а 18.30 усіх цікаўных запрашаюць на афіцыйную прэзентацыю праграмы і сустрэчу з калегіумам Лятучага. Прэзентацыя адбудзецца ў клубе Imaguru (вул. Фабрыцыуса, 4)
Рабі нечаканае,
Рабі, як не бывае,
Рабі, як не робіць ніхто, -
І тады пераможаш.
Уладзімір Караткевіч
Тыя, хто знаёмы з Лятучым не толькі з разавых мерапрыемстваў, ведаюць, што ўвесь час свайго існавання (а гэта больш за 5 год!) універсітэт знаходзіцца ў сталым пошуку новых формаў і спосабаў арганізацыі мысленчай працы, новага зместу адукацыі – найбольш адпаведнага ідэі сучаснага Універсітэта. Менавіта таму кожная наступная праграма, якую абвяшчае ўніверсітэт, не падобная на папярэднюю: захоўваючы добрыя ўніверсітэцкія традыцыі, мы заўсёды здзівім слухачоў і нечаканымі інавацыямі.
Новая праграма прадстаўляе два розныя ўзроўні адукацыі.
Для тых, хто хацеў бы выбудоўваць асабістую адукацыйную траекторыю ў вольным руху, Лятучы ўніверсітэт прапануе ўжо добра знаёмы традыцыйны фармат – адукацыйныя курсы. Гэты так званы «першы ўзровень» новай праграмы складаюць 8 курсаў, на якіх свае падыходы і практыкі мыслення прадставяць вядомыя беларускія інтэлектуалы і культурныя дзеячы: Уладзімір Мацкевіч, Міхал Анемпадыстаў, Ірына Дубянецкая, Генадзь Сагановіч, Міхась Баярын, Ігар Бабкоў, Павел Баркоўскі, Вячаслаў Бабровіч.
Другі ўзровень, і яму надаецца асаблівая ўвага, прадставяць Школы Магістраў Гульні - новы адукацыйны фармат Лятучага ўніверсітэта.
Разлічаныя на невялікія групы адмыслоўцаў, шчыльную камунікацыю з Настаўнікамі – вядомымі беларускімі інтэлектуаламі і мыслярамі, Школы задуманыя як месцы супольнай працы па стварэнні новых сэнсаў і практыкаў:
Школа гісторыі ідэй (кіраўнік – Ігар Бабкоў)
Метадалагічная школа (кіраўнікі - Уладзімір Мацкевіч, Тацяна Вадалажская)
Школа ВКЛ (кіраўнік – Алег Дзярновіч )
Школа сацыяльна-філасофскай аналітыкі (арганізатары - супольнасць «Беларускай Філасофскай прасторы»)
Чым адметныя гэтыя два ўзроўні? Па якіх прынцыпах збудаваныя, якія крытэры адбору, патрабаванні і ўмовы ўдзелу? Што чакае слухачоў у выніку – якія здабыткі? Хто такі «Магістар Гульні» і каму будзе надавацца гэтая ступень у Лятучым?
Падрабязна даведацца пра канцэпцыю і структуру новай праграмы, пазнаёміцца з асновамі, прынцыпамі, зместам лекцыйных курсаў і Школаў Магістраў Гульні, адчуць цудоўную атмасферу інтэлектуальнага асяроддзя, у неафіцыйнай абстаноўцы пагутарыць з выкладчыкамі курсаў і кіраўнікамі Школаў можна будзе падчас прэзентацыі новай праграмы Лятучага ўніверсітэта, якая адбудзецца 13 лістапада ў клубе Imaguru (вул. Фабрыцыюса, 4). Пачатак а 18.30. Уваход вольны.
Запіс на курсы і школы ўжо адкрыты і трывае да 5 снежня. Пазнаёміцца з кароткімі анонсамі курсаў і Школаў, а таксама зарэгістравацца на іх можна тут
Каментары