«Што там? Ды фіг яго ведае!» — у Мінску прайшоў антыкрызісны форум прадпрымальнікаў
Больш за тысячу прадпрымальнікаў сабраліся ў гасцініцы «Беларусь».
«Мяккая зала» гатэля не магла змясціць усіх ахвотных. Некалькі сотняў чалавек тоўпіліся ў фае, там нічога чуваць не было.
«Што там?» — «Ды фіг яго ведае». Калі ўзгадвалі прозвішча кагосьці з чыноўнікаў, то звычайна далей ішла нецэнзурная лексіка.
На сцэне тым часам красаваўся Анатоль Шумчанка, публічныя выступы гэта тое, дзе лідар «Перспектывы» пачуваецца вельмі камфортна.
Шумчанка адразу стаў супрацьстаўляць «нас, народ» і «іх, чыноўнікаў».
Калі расказваў пра сустрэчу з намеснікам міністра эканомікі, то сказаў: «Ваш прэзідэнт кажа, што трэба ісці ад жыцця». «Не трэба крыўдзіцца на народ, іншых людзей у вас не будзе», — сказаў Шумчанка, звяртаючыся да ўладаў.
«Нам патрэбныя перамовы з урадам», — гэтыя словы выклікалі апладысменты ў зале.
«Крамам канфіскату Кіраўніцтва справаў прэзідэнта патрэбныя новыя тавары». Зала зноў узрываецца воплескамі. Прысутныя дастаткова бурна рэагавалі на ўсё, што адбываецца на сцэне. З зала час ад часу гучала абурэнне, што прадпрыемствы «Марка» нядаўна выдзелілі буйны крэдыт усяго пад 3%. «А хто нам дасць?» — крычаць людзі.
Шумчанка кажа, што ўказ №222 аб сертыфікацыі тавараў стварыў «сацыяльны канфлікт» у грамадстве.
У выніку форум прадпрымальнікаў паставіў перад сабой тры мэты.
1. Адмена ўказа №222 аб сертыфікацыі тавараў.
2. Увядзенне мараторыю на канфіскацыю тавараў.
3 Зменшэнне падаткаў для ІП, пакуль заробкі ў краіне не дасягнуць тысячы даляраў.
Шумчанка намякае, што прадпрымальнікі могуць пайсці на збор подпісаў для правядзення рэферэндуму. «Няўжо мы не збяром 50 тысяч подпісаў?». «Збяром» — шматгалоса адказвае зала.
Варта адзначыць, што яшчэ ні разу Лідзія Ярмошына не прызнавала ініцыятыўную групу па зборы подпісаў для рэферэндуму.
А напрыканцы сваёй палымянай прамовы лідар «Перспектывы» сказаў, што ўсё ж 80—90% працэнтаў ІПшнікаў маглі б працаваць з сертыфікатамі, а іх абурае менавіта канфіскацыя прадукацыі падаткавікамі.
Наступны на сцэну падымаецца намеснік міністра гандлю Андрэй Мяшкоў.
Калі Шумчанка хадзіў з мікрафонам па сцэне як пратэстанцкі пастар, то Мяшкоў строга стаў за трыбуну. Гэты ўжо немалады сівы чалавек размаўляў строгай канцылярскай мовай.
«Давай сваімі словамі», — гудзе зала. «Тых, хто будзе выкрыкваць з месца, выведзем з залы», — адказвае Шумчанка.
Мяшкоў кажа, што патрэбна ствараць перамоўную групу на базе Міністэрства эканомікі, чым хутчэй гэта будзе зроблена, тым лепш. Мяшкоў, у сваю чаргу, назваў тэму «кроватачывай праблемай».
Святлана Калачова з Гомеля ад «імя ўсіх ІП» звяртаецца да Лукашэнкі «як да галавы нашай дзяржавы».
«У нашай краіне вялікая праблема, толькі вы можаце яе вырашыць. Мы, індывідуальныя прадпрымальнікі, не можам здзяйсняць ад 1 студзеня сваю дзейнасць. У нас няма магчымасці пераходзіць на новую сістэму. Як можна параўноўваць супермаркеты і індывідуальных прадпрымальнікаў. ІПэшнікі засталіся без сродкаў. Вам няверна чыноўнікі прадстаўляюць інфармацыю. Каму выгадна сутыкаць ваш народ з уладай? Аляксандр Рыгоравіч, умяшайцеся ў сітуацыю. Пачуйце нас, калі ласка», — у канцы выступа Калачова падняла свой беларускі пашпарт.
Усе людзі сустрэлі гэта воплескамі і крыкамі «Адмена». Самы эмацыйны выступ.
* * *
Аб'яднанне «Перспектыва» адправіла звароты на імя прэм'ер-міністра і кіраўніка адміністрацыі Лукашэнкі з прапановай правесці перамовы «на пляцоўцы «форуму» з мэтай развязання вострага канфлікту ў прадпрымальніцкім асяроддзі».
Нагадаем, што многія прадпрымальнікі, якія гандлявалі на рынках абуткам і вопраткай, спынілі працу. У залежнасці ад рынкаў на працу не выйшлі 70—90% гандляроў.
Гэта звязана з тым, што 1 студзеня 2016 года канчаткова набыў моц указ №222, які забараняе гандляваць таварам без накладных і сертыфікатаў. Чыноўнікі рабілі некалькі крокаў насустрач прадпрымальнікам: напрыклад, працягнулі тэрмін, калі можна было гандляваць рэшткамі несертыфікаванага тавару, знялі абмежаванні на колькасць гандлёвых кропак, дазволілі наймаць на працу не толькі сваякоў. Іпэшнікам далі зразумець: ад пачатку года ўказ пачне працаваць, падабаецца гэта ім ці не. Так і здарылася.
«Перспектыва» сцвярджае, што «пустыя рынкі і гандлёвыя цэнтры — гэта свядомы працоўны сацыяльны пратэст прадпрымальнікаў», а не «калядныя вакацыі», як заяўляюць некаторыя чыноўнікі.
Цяпер чытаюць
Хто прадаў кватэру ў «Маяку Мінска» зніклай Мельнікавай? Такога чалавека не існуе9
Каментары