Мінскае прыватнае прадпрыемства, якое мае некалькі кірункаў дзейнасці, знаходзіцца пад пагрозай ліквідацыі з-за запазычанасці па заработнай плаце перад сваімі работнікамі, паведаміў на сустрэчы з журналістамі 16 лютага пракурор Мінска Сяргей Хмарук.
«Летась у Мінску было 17 прадпрыемстваў, якія мелі запазычанасць па заработнай плаце перад сваімі работнікамі. Дзякуючы дзеянням усіх дзяржаўных органаў па выніках года такіх прадпрыемстваў засталося тры. У дачыненні да аднаго з прадпрыемстваў, якое не выконвала свае абавязацельствы па выплаце зарплаты, пракуратурай горада прад'яўленая заява аб яго ліквідацыі. Цяпер справа разглядаецца ў эканамічным судзе», — сказаў Хмарук.
Называць гэтае прадпрыемства ён не стаў, заявіўшы, што цяпер яно «жывое, там працуюць людзі». «Паберажэм яго», — сказаў пракурор Мінска.
«Цяпер гэтае прадпрыемства адшуквае максімальныя магчымасці для таго, каб пагасіць запазычанасць па заработнай плаце. Пагасіць — пракурор адмовіцца ад іску. Самае галоўнае, каб людзі працы атрымлівалі заробленыя грошы», — заявіў Хмарук.
Пры гэтым пракурор Мінска адзначыў, што ў гэтага прадпрыемства «акрамя вялікай запазычанасці перад работнікамі маецца запазычанасць і па падатках, зборах». «Але і яму вельмі шмат павінны. Калі з гэтым прадпрыемствам будуць разлічвацца яго контрагенты, яно будзе мець магчымасць пагасіць свае даўгі і далей займацца сваёй вытворчасцю», — упэўнены Хмарук.
Ён спадзяецца, што прадпрыемства разлічыцца з работнікамі, і пракуратура адклікае свой іск.
Каментары