У свой традыцыйны кадравы дзень, пятніцу, Лукашэнка прыняў шэраг кадравых рашэньняў. Ён прызначыў Усевалада Янчэўскага памочнікам прэзыдэнта Беларусі — начальнікам галоўнага ідэалягічнага ўпраўленьня Адміністрацыі прэзыдэнта. Экс-гэбісту Дземянцею знайшлі пасаду на мытні, а міністрам сельскай гаспадаркі паставілі прарынкавага дырэктара Шапіру.
Аляксандр Лукашэнка сёння назначыў Усевалада Янчэўскага памочнікам прэзідэнта Беларусі — начальнікам галоўнага ідэалагічнага ўпраўлення Адміністрацыі прэзідэнта. Аб гэтым БЕЛТА паведамілі ў прэс‑службе А. Лукашэнкі.
Да назначэння на гэту пасаду Усевалад Янчэўскі быў першым намеснікам начальніка галоўнага ўпраўлення — начальнікам упраўлення па каардынацыі ідэалагічнай работы галоўнага ідэалагічнага ўпраўлення Адміністрацыі прэзідэнта Беларусі.
Як паведаміў журналістам Усевалад Янчэўскі, перад давераным яму ўпраўленнем «стаяць задачы растлумачэння дзяржаўнай палітыкі, а не прапаганды або націску на людзей, як некаторыя спрабуюць паказаць ідэалагічную работу».
* * *
Перад прыходам у Адміністрацыю прэзыдэнта Ўсевалад Янчэўскі займаў пасаду галоўнага рэдактара грамадзка-палітычнага часопісу «Планета» Адміністрацыі прэзыдэнта Беларусі. Ён спрабаваў зрабіць гэтае выданьне прапагандысцкім, прааўтарытарным, але ў форме «жоўтага» каляровага часопісу. Хадзілі чуткі, што менавіта Янчэўскаму належала ідэя паклікаць рок-музыкаў на канапу ў прэзыдэнтуру. Янчэўскі вядомы адноснай адкрытасьцю і ўвагай да недзяржаўных крыніцаў інфармацыі.
* * *
Усевалад Янчэўскі нарадзіўся 22 красавіка 1976 г. у Барысаве. Скончыў юрыдычны факультэт Белдзяржунівэрсытэту (1998). Працаваў першым сакратаром ЦК Беларускага патрыятычнага саюзу моладзі (БПСМ, 1997--2001).
Дэпутат палаты прадстаўнікоў нацыянальнага сходу Рэспублікі Беларусі (з 2000).
Сябра праўленьня Фонду сацыяльнай абароны моладзі, сябра калегіі Нацыянальнай дзяржаўнай тэлерадыёкампаніі, сябра калегіі Дзяржаўнага камітэту па справах моладзі.
Быў актывістам прэзыдэнцкай кампаніі (1994) А.Лукашэнкі, сябрам перадвыбарнага штабу (1995) С.Шушкевіча падчас выбараў у Вярхоўны Савет.
Быў у партыі Славянскі Сабор "Белая Русь".
Жанаты.
* * *
Сёньня Аляксандар Лукашэнка таксама прыняў некалькі кадравых рашэньняў. Былы намесьнік старшыні КДБ Васіль Дземянцей (зьняты разам з Сухарэнкам у часе скандалу вакол зьбіцьця Ломаця) прызначаны намеcьнікам старшыні Дзяржаўнага мытнага камітэту, Анатоль Сьцёпусь прызначаны надзвычайным і паўнамоцным паслом у Вялікай Сацыялістычнай Народнай Лівійскай Арабскай Джамахірыі, Сямён Шапіра (дырэктар агракамбінату «Дзяржынскі», вядомы сваёй прыхільнасьцю да капіталітыстых мадэляў разьвіцьця агракомплексу) — міністрам сельскай гаспадаркі і харчаваньня, Уладзімер Астапенка - надзвычайным і паўнамоцным паслом Беларусі ў Рэспубліцы Куба, Ігар Сокал -- у Рэспубліцы Узбекістан.
Завадчанін Ігар, які вяртаўся дадому бухім, упершыню ў жыцці едзе за мяжу. А яшчэ ён халасты7
Каментары