Польскі распрацоўшчык відэагульняў «Destructive Creations» запускае гульню «IS Defense» (абарона ад «Ісламскай дзяржавы»), дзе герой павінен абараніць Еўропу ад ісламскай тэрарыстычнай навалы.
Сюжэт гульні выглядае наступным чынам: «Ісламская дзяржава» распаўсюдзіла свой уплыў на тэрыторыю Блізкага Усходу, пасля захапіла паўночную Афрыку і пачала ўварванне на тэрыторыю Еўропы. Галоўны герой мусіць абараніць «стары кантынент» ад тэрарыстаў, беручы ўдзел ва ўзброеных канфліктах і ваенных аперацыях. Гульня адбываецца ад першай асобы, а персанаж з’яўляецца кулямётчыкам НАТA.
Некаторыя СМІ ўжо пачалі нападкі на распрацоўшчыкаў гульні, абвінавачваючы іх у расізме і ксенафобіі.
Але кіраўніцтва Destructive Creations спакойна адказвае на такія нападкі — вось што яны пішуць на сваёй старонцы ў Facebook: «Забойства тэрарыстаў — гэта ксенафобія? Ну крута, можаце называць мяне ксенафобам, бо я хачу страляць злых людзей».
Таксама ў адказ на крытыку кіраўнік кампаніі Яраслаў Зялінскі патлумачыў свае погляды на сітуацыю. «Я быў абвінавачаны ў ксенафобіі, таму што лайкнуў старонку «Польскай лігі абароны» на Facebook, якая відавочна антыісламская, не нацыяналістычная. Гэта дзве розныя рэчы. Некаторыя з нас маюць даволі правыя палітычныя погляды, але ўсё гэта заснавана на лагічным мысленні, а не на нянавісці ці фанатызме. У тым ліку ў мяне. І я да гэтага часу не разумею, што такога дрэннага ў нацыяналізме?» — заявіў Зялінскі.
«Людзі блытаюць і змешваюць дэфініцыі, аб’ядноўваючы нацызм, фашызм і шавінізм. Няма нічога дрэннага ў патрыятызме і клопаце аб сваіх людзях і культуры», — дадаў кіраўнік Destructive Creations.
Да таго ж, ён выказаў меркаванне, што «Ісламская дзяржава» ўжо даўно выкарыстоўвае патокі эміграцыі ў Еўропу ў сваіх мэтах.
Гульня «IS Defense» была прэзентаваная 19 красавіка і ўжо даступная ў сеціве. Кошт складае каля 6,66 еўра. Трэйлер гульні можна паглядзець тут.
