Яны выяўленыя ва Ўруччы, Зялёным Лузе, Сьляпянцы і нават у Драздах.
172 чалавекі звярнуліся ў сакавіку—красавіку гэтага года ў сталічныя медыцынскія ўстановы з прычыны ўкусаў кляшчоў. Як паведамілі БелаПАН у аддзяленні паразіталогіі Мінскага гарадскога цэнтра гігіены і эпідэміялогіі, 37 з іх паведамілі, што былі ўкушаны на тэрыторыі Мінска і прыгарада.
Спецыялісты зазначаюць, што штогод прыблізна 10% пацярпелых указваюць на ўкус кляшча ў межах лесапаркавых зон Мінска і наваколляў. Найбольшую колькасць укусаў жыхары сталіцы адзначалі ў час знаходжання за горадам, у тым ліку на садова‑агародных участках на тэрыторыі Мінскага, Пухавіцкага, Стаўбцоўскага, Дзяржынскага, Маладзечанскага, Уздзенскага і іншых раёнаў Мінскай вобласці.
Спецыялістамі санэпідслужбы горада іксадовыя кляшчы былі выяўлены ў прыгарадных лясах каля вадасховішчаў Заслаўскае, Крыніца, Дразды, пасёлка Сосны і лясных масівах на ўскраіне горада, прылеглай да жылой забудовы ў раёне Цнянскага вадасховішча і вуліцы Мірашнічэнкі, Зялёнага Луга, Уручча, Сцяпянкі, Сляпянкі, вуліц Ангарская, Герасіменкі, Сцебянёва. Кляшчоў таксама выявілі ў сталічным парку Перамогі, Батанічным садзе, парку 50‑годдзя Кастрычніка і размешчанай побач з ім зялёнай зоне на вуліцах Бехцерава і Жылуновіча, лесагадавальніку ў раёне вуліцы Панамарэнкі.
Іксадовыя кляшчы з’яўляюцца пераносчыкамі небяспечных захворванняў — хваробы Лайма і кляшчовага энцэфаліту. За сакавік—красавік гэтага года ў Мінску зафіксавана 13 выпадкаў захворвання Лайма.
У 2007 годзе ў лячэбныя ўстановы сталіцы з прычыны ўкусаў кляшчоў звярнуліся 7.617 чалавек (у 2006 годзе — 8.671). У 2007 годзе ў Мінску было зарэгістравана 150 выпадкаў захворвання Лайма (у 2006 годзе — 230) і шэсць выпадкаў кляшчовага энцэфаліту (у 2006 годзе — 17). У 2006 годзе ў Мінску быў зафіксаваны выпадак групавога захворвання жыхароў кляшчовым энцэфалітам пасля ўжывання непаранага казінага малака.
Былога вайскоўца з Брэста, які вярнуўся з Польшчы, абвінавацілі ў «тэрарызме» і адправілі ў калонію6
Каментары