Дырэкцыя Беларускай АЭС абвяргае інфармацыю пра інцыдэнт на будаўнічай пляцоўцы
Дырэкцыя Беларускай атамнай станцыі абвяргае інфармацыю пра інцыдэнт на будаўнічай пляцоўцы АЭС, якую напярэдадні распаўсюдзілі літоўскія СМІ са спасылкай на прэс-сакратара Дэпартамента дзяржбяспекі Літвы Вітаўтаса Макаўскаса, паведамляе прэс-служба Міністэрства энергетыкі Беларусі.
У прыватнасці, 7 чэрвеня на літоўскім партале навін delfi.lt была апублікаваная нататка аб тым, што Дэпартамент дзяржбяспекі Літвы правярае інфармацыю пра інцыдэнт, які нібыта адбыўся на мінулым тыдні на пляцоўцы будаўніцтва Беларускай АЭС. Падрабязнасці гэтага інцыдэнту выданне не прыводзіць. Раніцай 8 чэрвеня на delfi.lt таксама з'явіўся каментар міністра энергетыкі Літвы Рокаса Масюліса, які заявіў: «Пакуль у нас няма дэталяў аб яшчэ адным магчымым інцыдэнце на АЭС у Астраўцы. Аднак інфармацыя, якая з'явілася, выклікае вялікую занепакоенасць у сувязі з бяспекай будучай электрастанцыі».
Прэс-служба беларускага Мінэнерга ў адказ на гэтыя заявы літоўскага боку паведаміла, што «будаўніцтва Беларускай АЭС вядзецца ў штатным рэжыме» і «ніякіх інцыдэнтаў пры вытворчасці будаўніча-мантажных работ у названы ў інфармацыі перыяд не было».
«Кантроль за якасцю выкананых будаўніча-мантажных работ на пляцоўцы Беларускай АЭС ажыццяўляецца ў адпаведнасці з устаноўленым рэгламентам», — гаворыцца ў паведамленні ад імя міністэрства.
Каментары