Усерасійскае аб'яднанне заўзятараў паведаміла, што яго кіраўніка Аляксандра Шпрыгіна выдвараюць з Францыі, дзе праходзіць чэмпіянат Еўропы па футболе.
У паведамленні на сайце арганізацыі гаворыцца, што ўлады Марсэля вырашылі выслаць з Францыі 20 з 40 затрыманых членаў дэлегацыі УАЗ, у тым ліку Шпрыгіна. Яшчэ 20 чалавек адпусцяць.
Сам Шпрыгін у размове з агенцтвам ТАСС растлумачыў, што аб адпаведным рашэнні даведаўся з пастановы прэфекта Марсэля, якую яму ўручылі.
Па словах кіраўніка УАЗ, у дакуменце гаворыцца, што выслаць заўзятараў з краіны вырашана на падставе інфармацыі, атрыманай ад расійскага боку.
Згодна з дакументам, Расія паведаміла французам, што члены дэлегацыі УАБ «могуць уваходзіць у групы актыўных заўзятараў і тым самым уяўляць пагрозу бяспецы».
Шпрыгін адзначыў, што гаворка ідзе менавіта пра выдварэнне, а не пра дэпартацыю без права вяртання. Іншымі словамі, візы высланых расіянаў, па словах кіраўніка УАЗ, не будуць ануляваныя.
На выкананне рашэння аб высылцы 20 заўзятараў улады Марсэля адвялі пяць дзён. Шпрыгін заявіў, што плануе абскардзіць рашэнне.
Каментары