Уладзімір Някляеў будзе адзначаць 70 гадоў без дазволу Мінгарвыканкама
Паэт і палітык Уладзімір Някляеў сёння збіраецца адсвяткаваць свой 70-гадовы юбілей чытаннем вершаў у скверы імя Янкі Купалы.
Пра гэта ён паведаміў на сваёй старонцы ў фэйсбуку. Падчас імпрэзы адбудзецца прэзентацыя новай кнігі паэта «Толькі вершы».
Разам з юбілярам песні на вершы Някляева ды іншых беларускіх паэтаў праспяваюць Зміцер Вайцюшкевіч і Лявон Вольскі.
На мінулым тыдні Уладзімір Някляеў хацеў узяць дазвол на правядзенне літаратурных чытанняў у скверы імя Янкі Купалы, але атрымаў адмову.
«У заяўцы я напісаў пра даўнюю традыцыю літаратурных чытанняў ля помніка Янку Купалу. Там чыталі свае вершы ў юбілейныя дні Максім Танк, Аркадзь Куляшоў, Пімен Панчанка, Рыгор Барадулін, Ніл Гілевіч, маладыя паэты. Традыцыі літаратурных чытанняў існуюць ва ўсіх еўрапейскіх сталіцах, і цяпер мяне з нагоды юбілею запрашаюць у Хельсінкі і Стакгольм, Нью-Ёрк, Вільню і Варшаву. А вось у родным горадзе я госць нежаданы. Спачатку мне перашкаджалі выдаваць вершы, цяпер забараняюць іх чытаць», — сказаў Някляеў.
Каментары