Вытворца Snapchat выпусціў сонечныя акуляры з убудаванай камерай
Кампанія Snapchat, галоўным прадуктам якой з'яўляецца аднайменная мабільная праграма для абмену фатаграфіямі і кароткімі відэа, абвясціла пра выпуск сонечных акуляраў з убудаванай камерай.
Новы гаджэт пад назвай Spectacles паступіць у продаж ужо ў гэтым годзе і будзе каштаваць 130 даляраў.
Убудаваная камера дазволіць запісваць 10-секундныя відэа.
Адначасова з прэзентацыяй навінкі Snapchat абвясціла аб уласным перайменаванні — цяпер кампанія будзе называцца Snap, Inc. Тым самым кампанія падкрэслівае, што збіраецца пашырыць сваю дзейнасць за межы абслугоўвання месенджара Snapchat.
Вынаходнік Snapchat Эван Шпігель распавёў, што ўжо апрабаваў новыя акуляры падчас уласнага адпачынку.
«Калі я паглядзеў зняты матэрыял, у мяне было адчуванне, быццам я зноўку пражываю свае ўспаміны. Гэта было неймаверна», — сказаў Шпігель у інтэрв'ю Wall Street Journal.
Навінка кампаніі Snap нагадвае няўдалы праект інтэрнэт-гіганта Google, які спрабаваў стварыць Google Glass — падобную да акуляраў гарнітуру для смартфонаў, якая спалучае празрысты дысплей і відэакамеру.
Праект дайшоў да стадыі выпуску партыі прататыпаў — кожны коштам у 1500 даляраў.
Распрацоўка аказалася вельмі сырой з пункту гледжання праграмнага забеспячэння, таму ў серыю не пайшла. Прычым акрамя тэхнічных праблем карыстальнікі Google Glass выявілі неадназначнае ўспрыманне гэтага гаджэта з боку навакольных.
Адны палічылі, што акуляры з відэакамерай, якая пастаянна працуе, з'яўляюцца пагрозай праву людзей на асабістае жыццё. А на думку іншых, чалавек з напятым на вочы Google Glass выглядае проста недарэчна.
Цяпер чытаюць
Коўл Лукашэнку: Табе трэба быць больш асцярожным, за сталом кепскіх пацаноў застаўся адзін ты10
Каментары