Дакумент аб вырашэнні нафтагазавай спрэчкі паміж Беларуссю і Расіяй будзе падпісаны найбліжэйшымі днямі, паведаміў на прэс-канферэнцыі ў Мінску 20 снежня расійскі пасол Аляксандр Сурыкаў, піша БелаПАН.
Паводле яго слоў, дакумент будзе мець на ўвазе аднаўленне паставак нафты ў ранейшых аб'ёмах, а таксама аплату энерганосьбітаў у межах дзейных кантрактаў.
«Нафтагазавыя пытанні — яны ва ўсіх на вуснах. Як я ўжо казаў, ёсць разуменне падыходаў да вырашэння гэтай спрэчкі. Дрэнна, што яна пачынала вырашацца сілавым шляхам і не ў прававым полі, вось галоўная дэталь гэтых недамоўленасцяў. Дасягнутае паразуменне», — заявіў дыпламат.
Журналісты нагадалі Сурыкаву, што 15 снежня ён анансаваў вырашэнне нафтагазавай спрэчкі да 20 снежня. «Дваццатае чысло, не дваццатае… Але найбліжэйшымі днямі ў любым выпадку будзе падпісаны адпаведны дакумент, які здыме ўсе рознагалоссі. У Беларусь адновіцца пастаўка нафты — спачатку баланс, а потым пастаўка нафты па абвешчаных першапачаткова 24 млн тон на гэты год, на будучы год, і адновіцца дзеянне аплаты паводле дзейнага кантракта паміж «Газпром трансгаз Беларуссю» і «Белпалівагазам», — удакладніў пасол РФ.
Пры гэтым ён не выключыў зніжэння цаны пастаўлянага ў Беларусь газу ад дзейнай, якая складае 132 долары за тысячу кубаметраў. «Калі гэты кантракт быў падпісаны, плацілі 163, потым знізіліся цэны на сусветных рынках вуглевадародаў. Калі далей пойдзе [зніжэнне], значыць, будзе не 132», — дадаў дыпламат.
Узнікненне спрэчкі Сурыкаў патлумачыў тым, што кантракт «увайшоў у пэўную дысгармонію з міжурадавым пагадненнем у межах ЕАЭС, дзе гаворыцца аб роўнадаходных цэнах на энерганосьбіты». «Трэба гэтую неадпаведнасць выдаліць, вось яе зараз і выдаляюць», — падкрэсліў расійскі пасол.
Пры гэтым Сурыкаў заявіў, што новы двухбаковы кантракт на пастаўку энерганосьбітаў з Расіі ў Беларусь на найбліжэйшыя гады, які рыхтуецца, будзе адпавядаць пагадненням у межах ЕАЭС.
Цяпер чытаюць
У віцэ-спікеркі Каардынацыйнай рады Лізаветы Пракопчык сабралася $12 тысяч даўгоў71
Каментары