Прэзідэнт ЗША Дональд Трамп падпісаў новы ўказ, якім прыпыняецца на 90 дзён ўезд у ЗША грамадзян шасці краін — Ірана, Емена, Лівіі, Сірыі, Самалі і Судана, паведамляе ВВС.
Акрамя таго, на 120 дзён прыпыненая праграма прыёму бежанцаў у ЗША. У адрозненне ад папярэдняга ўказа, Ірак у гэтым спісе не фігуруе.
Як заявіў на брыфінгу прадстаўнік Белага дома, ужо выдадзеныя візы або дазволы на часовае пражыванне ў ЗША скасаваныя не будуць.
Нагадаем, у канцы студзеня Дональд Трамп падпісаў указ, якім прыпыняецца прыём Злучанымі Штатамі бежанцаў з іншых краін. Указ, паводле яго слоў, закліканы не дапусціць у краіну «радыкальных мусульманскіх тэрарыстаў».
Рашэнне Трампа выклікала крытыку з боку ААН, а таксама праваабарончых арганізацый і грамадскіх дзеячаў, як у ЗША, так і за іх межамі.
Пасля гэтага Федэральны акруговы суд у Нью-Ёрку наклаў часовую забарону на высылку мігрантаў з дзейнымі амерыканскімі візамі з аэрапортаў ЗША.
4 лютага Федэральны суд у Сіэтле (штат Вашынгтон) цалкам прыпыніў дзеянне ўказа Дональда Трампа, а праз тыдзень апеляцыйны суд у Сан-Францыска пакінуў рашэнне ніжэйстаячай інстанцыі ў сіле.
Цяпер чытаюць
Ціханоўская і Зяленскі ўпершыню правялі сустрэчу. Зяленскі запрасіў Святлану ў Кіеў8
Каментары