«У мяне валасы як салома!» Якія памылкі мы робім пры доглядзе за валасамі летам

Чаму валасы летам хутка губляюць выгляд і ці патрэбны SPF?

Лета агрэсіўна ўздзейнічае на валасы. Ультрафіялетавыя прамяні пранікаюць глыбока ў стрыжань, разбураючы керацін і меланін. Гэта выклікае выцвітанне і робіць пасмы порыстымі. Інфрачырвонае выпраменьванне перасушвае ўнутраны пласт воласа — кортэкс, з-за чаго ён губляе эластычнасць і становіцца ломкім.

SPF для валасоў неабходны. Важна выбіраць сродкі з фізічнымі фільтрамі і адмысловымі палімерамі, якія ствараюць нябачную ахоўную плёнку.

Важны нюанс: увільгатняльныя спрэі з SPF без воданепранікальных уласцівасцей могуць спрацаваць як лінза. Пад гарачым сонцам кроплі вады на валасах факусіруюць прамяні, узмацняючы апёк кутыкулы. Таму пляжныя сродкі абавязкова павінны ўтрымліваць сіліконы або алеі, якія адштурхваюць ваду.

Як правільна мыць галаву летам

Летам праца сальных залоз паскараецца, таму хадзіць з бруднай галавой больш шкодна, чым часта яе мыць — апошняе можна рабіць хоць штодня.

Выкарыстоўвайце цёплую, а не гарачую ваду (высокая тэмпература стымулюе сальныя залозы яшчэ мацней).

Выбірайце сродкі для штодзённага прымянення або з паметкай «глыбокае ачышчэнне» (з глінай, цынкам, саліцылавай кіслатой). Мыйце галаву двойчы: першы раз змываецца бруд, другі — ачышчаецца скура.

Пры свербе ці перхаці раз на 10—14 дзён выкарыстоўвайце мяккі скраб або шампунь з AHA/BHA-кіслотамі, а для апалосквання — ваду з лімонным сокам або яблычным воцатам (кіслае асяроддзе варожае для бактэрый).

Ніколі не кладзіцеся спаць з мокрымі або вільготнымі валасамі. Ад сутыкнення з падушкай ствараецца парніковы эфект — ідэальнае асяроддзе для размнажэння грыбкоў.

Галаўныя ўборы і кандыцыянеры ў памяшканнях

Самі па сабе галаўныя ўборы не шкодзяць, але небяспека крыецца ў спалучэнні бруду, поту і цяпла. Пад шчыльнай сінтэтычнай кепкай гэтая сумесь закаркоўвае поры, выклікае сверб і перхаць. Аддавайце перавагу натуральным тканкам — бавоўне або льну — і здымайце галаўны ўбор у памяшканні.

Кандыцыянеры перасушваюць паветра, выцягваючы вільгаць з валасоў. У офісе або машыне наносьце на кончыкі незмывальны крэм ці алей — яны створаць ахоўны бар’ер.

Як мінімізаваць шкоду ад купання ў вадаёмах і басейнах

Хлор разбурае ліпідны пласт і вымывае пігмент, марская соль дзейнічае як абразіў і выцягвае вільгаць, а жорсткая прэсная вада пакідае солі кальцыю і магнію.

Рэцэпт выратавання: намачыце валасы чыстай вадой з душа перад заплывам. Паколькі яны ўжо напоўняцца вільгаццю, соль і хлорка не ўбяруцца. Пасля выхаду з вады апаласніце галаву, а дома выкарыстайце шампунь і незмывальны кандыцыянер.

Чаму шкодна сушыць валасы на ветры і рабіць тугія прычоскі

Сушыць валасы на цёплым ветры вельмі шкодна. Ствараецца эфект паравой лазні: вільгаць выпараецца толькі з паверхні, а ўнутры застаецца, з-за чаго лускавінкі літаральна разрываюцца. Да таго ж да вільготных пасмаў ліпне пыл.

«Залізаныя» хвасты, пучкі і металічныя заколкі прыводзяць да тракцыйнай алапецыі (выпадзення валасоў ад нацяжэння). Бяспечней збіраць валасы ў свабодныя косы або нізкія хвасты, выкарыстоўваць шаўковыя стужкі або пластыкавыя «крабікі» з гладкімі зубамі.

Летні рацыён і афарбоўванне

Летні рацыён працуе з адтэрміноўкай у 2—3 месяцы. Клубніцы і чарніцы (вітамін С, антыаксіданты), чарэшня (медзь супраць ранняй сівізны) і маладая зеляніна (яе трэба есці з тлушчамі) умацуюць цыбуліны толькі да верасня. Пры гэтым любыя ягады будуць малаэфектыўныя без дастатковай колькасці бялку (бабовыя, гарошак).

Афарбоўванне і керацін. Перад адпачынкам гэта дрэнная ідэя, бо сонца і соль хутка разбураць вынік. Плануйце такія працэдуры мінімум за два тыдні да адпачынку.

Сухі шампунь. Пасля выкарыстання яго абавязкова трэба вычэсваць на ноч, каб часціцы крухмалу не забівалі пары.

Тры галоўныя правілы летняга догляду ад трыхолага

Змывайце «пляжную» ваду да шампуня. Перад мыццём нанясіце маску або бальзам на 2—3 хвіліны, каб нейтралізаваць соль і хлор без траўмавання кутыкулы.

SPF — штодня. Наносьце спрэй з SPF перад выхадам з дому. Сонца руйнуе прыродны керацін не горш за плойку.

Адмоўцеся ад высокай тэмпературы. Сушыце фенам толькі карані, а даўжыню пакідайце сохнуць натуральным шляхам.

• 1
• 0
• 0
• 1
• 0
• 0
• 0
• 0