Астравец, Фаніпаль, хто яшчэ? Рэйтынг гарадоў па прыросце насельніцтва
Белстат падлічыў насельніцтва ўсіх гарадоў і мястэчак Беларусі па стане на пачатак 2017 года.
Якія цікавыя лічбы можна заўважыць?
1. Сярод абласных гарадоў найбольшы пастаянны прырост дэманструе Гродна. Насельніцтва горада складае 368 710 чалавек, і ўжо зусім хутка перагоніць Віцебск (там жывуць 369 933 чалавек). Недалёка знаходзіцца і Магілёў (380 440 чалавек). Пры захаванні цяперашняй дынамікі Гродна праз некалькі гадоў зможа стаць трэцім горадам краіны, услед за Мінскам і Гомелем.
2. Паколькі правінцыя вымірае, становіцца ўсё больш раёнаў з крытычна нізкім узроўнем насельніцтва. У Расонскім раёне жывуць 9350 чалавек, у Краснапольскім — 9520, у Дрыбінскім — 9870. На мяжы яшчэ Нараўлянскі (10430) і Хоцімскі (10640). Ці ёсць сэнс у існаванне такіх раёнаў? Пытанне перадусім эканамічнае, бо ў кожным з гэтых выпадкаў асобная адміністрацыя працуе для такой самай колькасці людзей, як квартал новабудоўляў у сталіцы.
3. Насельніцтва Мінска працягвае падбірацца да 2 мільёнаў (пакуль што 1 974 819 чалавек). Аднак гэта гаворка толькі пра адміністратыўныя межы горада. Напрыклад, у Калодзішчах, куды заязджае сталічны гарадскі грамадскі транспарт, жыве яшчэ каля 17,5 тысячы чалавек. І гэта фармальна ў аграграрадку!
Адначасова працягваецца і развіццё спадарожнікаў. І Фаніпаль, і Заслаўе, і Лагойск, і Смалявічы, і Дзяржынск — усе ва ўпэўненым плюсе.
* * *
Топ беларускіх гарадоў па прыросце насельніцтва:
| Горад | 2017 | 2016 | % | |
| 1 | Астравец | 10 253 | 9569 | 7,15% |
| 2 | Фаніпаль | 15 922 | 15 198 | 4,76% |
| 3 | Гомель | 535 229 | 521 452 | 2,64% |
| 4 | Столін | 13 269 | 12 951 | 2,46% |
| 5 | Горкі | 34 553 | 33 830 | 2,14% |
| 6 | Добруш | 18 760 | 18 380 | 2,07% |
| 7 | Ашмяны | 16 684 | 16 388 | 1,81% |
| 8 | Заслаўе | 15 419 | 15 151 | 1,77% |
| 9 | Лагойск | 12 950 | 12 739 | 1,66% |
| 10 | Лунінец | 24 712 | 24 412 | 1,23% |
| 11 | Калінкавічы | 40 315 | 39 860 | 1,14% |
| 12 | Мядзел | 6949 | 6871 | 1,14% |
| 13 | Брэст | 343 985 | 340 141 | 1,13% |
| 14 | Скідзель | 10 709 | 10 592 | 1,1% |
Мы ўключылі ў спіс тыя гарады, дзе насельніцтва вырасла больш чым на 1%.
Феномен Астраўца звязаны з будаўніцтвам атамнай электрастанцыі. А вось скачок Гомеля тлумачыцца тым, што ў межы горада ўключылі 10-тысячны рабочы пасёлак Касцюкоўка.
Цяпер чытаюць
Маўрыкій, Сейшэлы, Шры-Ланка і не толькі: паглядзелі, куды збеглі ад беларускіх маразоў праўладныя артысты і вядучыя13
Каментары